ការចុះទស្សនកិច្ចសិក្សាស្វែងយល់ រវាង សាលាតិចណូ និងក្រុមហ៊ុន Renaissance Minerals ដែលជាតំបន់រ៉ែមាសស្ថិតក្នុងខេត្តមណ្ឌលគិរី

Share on facebook
Share on google
Share on telegram

កាលពីថ្ងៃទី២៦ ខែតុលា ឆ្នាំ២០២១ ក្នុងក្របខណ្ឌនៃកិច្ចសហប្រតិបត្តិការទ្វេភាគីជាមួយក្រុមហ៊ុន Renaissance Minerals នៃប្រទេសអូស្រ្តាលី ឯកឧត្តមបណ្ឌិត អ៊ុម រម្យណី បានដឹកគណៈប្រតិភូនិងក្រុមការងារបច្ចេកទេស ដើមី្បធ្វើទស្សនកិច្ចសិក្សាស្វែងយល់ ក្នុងន័យបំពេញឱ្យគ្នាទៅវិញទៅមកនៃភាគីទាំងពីរ រវាង សាលាតិចណូ និង Renaissance Minerals។

គួររំលឹកថាក្រុមហ៊ុន Renaissance Minerals បានចុះបញ្ជីនៅក្នុងប្រទេសអូស្រ្តាលី និងទទួលបានអាជ្ញាប័ណ្ណរ៉ែឧស្សាហកម្ម ពីរាជរដ្ឋាភិបាលកម្ពុជា តាមរយៈក្រសួងរ៉ែ និងថាមពល កាលពីខែកក្កដាឆ្នាំមុន នៅឯគម្រោងមាសអូក្វាវ ស្ថិតក្នុងស្រុកមណ្ឌលសីមា ខេត្តមណ្ឌលគិរី។ អាជ្ញាប័ណ្ណនេះមានសុពលភាព ១៥ ឆ្នាំហើយអាចបន្តឡើងវិញបាន ១០ឆ្នាំ ទៀតរហូតដល់ ២ ដងស្របតាមច្បាប់កម្ពុជា។

ក្រុមហ៊ុនបានឱ្យដឹងថានាពេលបច្ចុប្បន្នក្រុមហ៊ុនបាននឹងកំពុងប្រើប្រាស់ធនធានមនុស្សប្រមាណ៣០នាក់ ដែលបានផលិតដោយមហាវិទ្យាល័យ ធនធានរ៉ែ និងភូគព្ភសាស្រ្តនៃវិទ្យាស្ថានបច្ចេកវិទ្យាកម្ពុជា (សាលាតិចណូ) និងអ្នកជំនាញការអូស្រ្តាលីប្រមាណ៥០នាក់ ដោយមិនទាន់គិតពីបុគ្គលិកផ្សេងៗទៀត។

សមភាគីអូស្រ្តាលីបានកោតសរសើរដល់សាលាតិចណូដែលបានបណ្តុះបណ្តាលធនធានមនុស្សផ្នែករ៉ែទាន់ពេលវេលា ដើមី្បចូលរួមការងាររុករកនិងផលិត ជាមួយគ្នា។ លោកអគ្គនោយកក្រុមហ៊ុន Renaissance Minerals ក៏បានសន្យាថានឹងទទួលយកវិស្វករក្នុងជំនាញផ្សេងៗទៀតដែរពីសាលាតិចណូ ដូចជាខាង (ទេពកោសល្ស ឧស្សាហកម្ម និងមេកានិក) និង (ទេពកោសល្ស អគ្គិសនី ថាមពល និងទូរគមនាគមន៍)។

ជាការឆ្លើយតប ឯកឧត្តមនាយក បានថ្លែងអំណរគុណចំពោះការសហការដ៍ល្អនិងពិតមានមោទនភាពដោយសារធនធានមនុស្សក្នុងស្រុករបស់យើងអាចមានសមត្ថភាពធ្វើការស្មើមុខស្មើមាត់ជាមួយបរទេស។ ឯកឧត្តមបានប្រសាសន៍បន្ថែមទៀតថា៖ “សាលាតិចណូនឹងខិតខំពង្រឹងបន្ថែមទៀតការបណ្តុះបណ្តាលរបស់ខ្លួនបន្ថែ ដើមី្បផ្គត់ផ្គង់តាមសំណើររបស់ក្រុមហ៊ុន”។