ពិធីបើកគម្រោងស្រាវជ្រាវជាផ្លូវការ៖ មន្ទីរពិសោធន៍ឧត្តមភាពសហប្រតិបត្តិការវិស្វកម្មដើម្បីកសិកម្មប្រកបដោយចីរភាព

“Laboratory of Excellence in co-Engineering for Sustainable Agriculture – LMI LEAD”

នៅវិទ្យាស្ថានបច្ចេកវិទ្យាកម្ពុជា ដែលបាននឹងកំពុងប្រារព្ធធ្វើនៅថ្ងៃទី ២០-២១ ខែមិថុនា ឆ្នាំ២០២៤

———————————

(វបក-ភ្នំពេញ) ៖ នាព្រឹកថ្ងៃព្រហស្បតិ៍ ១៤កើត ខែជេស្ឋ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី២០ ខែមិថុនា ឆ្នាំ២០២៤ នៅសាលប្រជុំ១០៩-អា ឯកឧត្តមសាស្រ្តាចារ្យបណ្ឌិត ប៉ូ គឹមថូ នាយកវិទ្យាស្ថានបច្ចេកវិទ្យាកម្ពុជា អញ្ជើញចូលរួមពិធីបើកគម្រោងស្រាវជ្រាវស្តីពី មន្ទីរពិសោធន៍ឧត្តមភាពសហប្រតិបត្តិការវិស្វកម្មដើម្បីកសិកម្មប្រកបដោយចីរភាព ត្រូវបាននឹងកំពុងរៀបចំឡើងដោយវិទ្យាស្ថានបច្ចេកវិទ្យា (ITC) និងវិទ្យាស្ថានស្រាវជ្រាវដើម្បីការអភិវឌ្ឍន៍ប្រកបដោយចីរភាពនៃប្រទេសបារាំង (IRD) សហការណ៍ជាមួយស្ថាប័នដៃគូផ្សេងៗទៀតរួមមាន សាកលវិទ្យាល័យជាតិបាត់ដំបង (NUBB) សាកលវិទ្យាល័យភូមិន្ទកសិកម្ម (RUA) មជ្ឈមណ្ឌលស្រាវជ្រាវកសិកម្មសម្រាប់ការអភិវឌ្ឍអន្តរជាតិនៃប្រទេសបារាំង (CIRAD) ដោយមានការគាំទ្រដោយក្រសួងអប់រំ យុវជន និងកីទ្បា (MoEYS) ក្រសួងកសិកម្ម រុក្ខាប្រម៉ាញ់ និងនេសាទ (MAFF) ក្រសួងឧស្សាហកម្ម បច្ចេកវិទ្យា វិទ្យាសាស្រ្ត និងនវានុវត្តន៍ (MISTI) ស្ថានទូតបារំាងប្រចាំប្រទេសកម្ពុជា និងទទួលបានធាតុចូលពីស្ថាប័ននិងអង្គការ ជាតិនិងអន្តរជាតិចំនួន06ផ្សេងទៀតបន្ថែមលើស្ថាប័នខាងលើ រួមមាន Université de Montpellier, International Rice Research Institute (IRRI), Sansom Mlup Prey Organization, GRET & AliSEA, Agronomes et Vétérinaires sans Frontières(AVSF) ជាដើម។

ពិធីបើកគម្រោងស្រាវជ្រាវនេះមានគោលបំណងដើម្បីប្រមូលផ្តុំអ្នកបង្កើតគោលនយោបាយ ស្ថាប័នសិក្សានិងស្រាវជ្រាវ និងវិស័យឯកជនមកពីបណ្តាញក្នុងស្រុក តំបន់ និងអន្តរជាតិដើម្បីចែករំលែកនិងពិភាក្សាអំពីការវាយតម្លៃបញ្ហាប្រឈមនានាក្នុងការអនុវត្តផលិតកម្មស្រូវប្រកបដោយនិរន្តរភាពនៅកម្ពុជាដើម្បីស្វែងរកដំណោះស្រាយរួមគ្នាប្រកបដោយប្រសិទ្ធភាពនិងនិរន្តរភាព។

ព្រឹតិ្តការណ៍នេះបាននិងកំពុងប្រព្រឹត្តទៅនៅវិទ្យាស្ថានបច្ចេកវិទ្យាកម្ពុជា (សាលាតិចណូ) ចាប់ពីថ្ងៃទី ២០-២១ ខែមិថុនា ឆ្នាំ២០២៤។ នៅថ្ងៃទី១ កម្មវិធីបានចាប់ផ្តើមជាមួយនឹងការប្រកាសបើកគម្រោងស្រាវជ្រាវក្រោមអធិបតីភាព ឯកឧត្តមបណ្ឌិត អ៊ុម រម្យណី រដ្ឋលេខាធិកាក្រសួងអប់រំ យុវជន និងកីឡា រួមនឹងគណៈប្រតិភូ០៦រូបទៀតរួមមាន ឯកឧត្តមបណ្ឌិត ចាន់ សារុទ្ធ អនុរដ្ឋលេខាធិកាក្រសួងកសិកម្ម រុក្ខាប្រម៉ាញ់ និងនេសាទ ឯកឧត្តមបណ្ឌិត គួក ហ្វីដេរ៉ូ អនុរដ្ឋលេខាធិកាក្រសួងឧស្សាហកម្ម បច្ចេកវិទ្យា វិទ្យាសាស្រ្ត និងនវានុវត្តន៍ និង លោកបណ្ឌិត ប៊ុន ឡុង នាយករកវិទ្យាស្ថានបច្ចេកវិទ្យាកម្ពុជា លោកស្រីសាស្រ្តាចារ្យ TRAN Thi Anh-Dao អនុព័ន្ធកិច្ចសហប្រតិបត្តិការវិទ្យាសាស្ត្រ និងសាកលវិទ្យាល័យនៃស្ថានទូតបារាំងប្រចាំនៅកម្ពុជា និងលោកស្រីសាស្រ្តាចារ្យ MARTIAL Adèle តំណាងIRD ប្រចាំប្រទេសកម្ពុជា។ កម្មវិធីបន្តបន្ទាប់ក្នុងថ្ងៃទី១បានបន្តដោយវេទិកាពិភាក្សាតុមូលចំនួនពីរ បន្តបង្ហាញលម្អិតពីសកម្មភាពស្រាវជ្រាវដោយសមាជិកគម្រោង និងបញ្ចប់ដោយទស្សនៈកិច្ចមន្ទីរពិសោធន៍ពាក់ព័ន្ធនៅវិទ្យាស្ថានបច្ចេកវិទ្យាកម្ពុជា។ កម្មវិធីថ្ងៃទី២ នឹងបន្តដោយការបង្ហាញវិធីសាស្រ្តចូលរួម (participatory approaches) ដែលនឹងបន្តការចូលរួមពីស្ថាប័នជាច្រើនផងដែរ។

គួរបញ្ជាក់ផងដែរថា គម្រោងស្រាវជ្រាវនេះបានទទួលការគាំទ្រហិរញ្ញវត្ថុពី IRD រយៈពេល ០៥ឆ្នាំចាប់ពីឆ្នាំ ២០២៤-២០២៨ (អាចនឹងបន្តបានប្រាំឆ្នាំទៀត) និងបាននឹងកំពុងដឹកនាំដោយសាស្ត្រាចារ្យជំនួយ បណ្ឌិត សួង ម៉ាលីណា អ្នកស្រាវជ្រាវផ្នែកបច្ចេកវិទ្យាអាហារនិងអាហារូបត្ថម្ភនៃវិទ្យស្ថានបច្ចេកវិទ្យាកម្ពុជា(ITC) និងដោយលោកបណ្ឌិត MOULIN Lionel (HDR) អ្នកស្រាវជ្រាវជាន់ខ្ពស់នៃ IRD។ លទ្ធផលរំពឹងទុកនៃគម្រោងទាំងមូលនឹងចូលរួមចំណែកជម្រុញដល់ការអនុវត្តផលិតកម្មស្រូវប្រកបដោយនិរន្តរភាពនៅកម្ពុជា និងក្នុងតំបន់។