(ភ្នំពេញ)៖ នារសៀលថ្ងៃពុធ ៥កើត ខែភទ្របទ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី៣១ ខែសីហា ឆ្នាំ២០២២ ឯកឧត្តមបណ្ឌិត ប៉ូ គីមថូ បានទទួលស្វាគមន៍ ឯកឧត្តម គង់ ពុទ្ធិការ អគ្គនាយក នៃអាជ្ញាធរជាតិព្រះវិហារ ដើម្បីចុះអនុស្សរណយោគយល់រួមគ្នា នៅវិទ្យាស្ថានបច្ចេកវិទ្យាកម្ពុជា។
ក៏មានការចូលរួមផងដែរ ពីលោកនាយករង ប៊ុន គឹមងន់ នាយករង និងសាស្រ្តាចារ្យនៃសាលាតិចណូ និង អគ្គនាយករង ប្រធាននាយកដ្ឋាន និងមន្ត្រី ដែលអញ្ចើញមកពីខេត្តព្រះវិហារ។
គោលបំណងនៃការចុះអនុស្សរណនេះ គឺ សហការសិក្សា ស្រាវជ្រាវទាក់ទងនឹងភូគព្ភសាស្រ្ត-បុរាណវិទ្យា នៅក្នុងតំបន់ស្ថិតនៅក្រោមការគ្រប់គ្រងរបស់អាជ្ញាធរជាតិព្រះវិហារ។ការបណ្តុះបណ្តាលធនធានមនុស្សក្នុងវិស័យវិទ្យាសាស្រ្ត-បុរាណវិទ្យា ចែករំលែកបទពិសោធន៍បច្ចេកទេសលើមុខជំនាញ ភូគព្ភសាស្រ្ត-បុរាណវិទ្យា និងលើកកម្ពស់ការបោះពុម្ពផ្សាយលទ្ធផលស្រាវជ្រាវវិទ្យាសាស្រ្តក្នុងកំរិតតំបន់ និងអន្តរជាតិ ពិតជាស្ថិតនៅក្នុងក្របខណ្ឌនៃកិច្ចសហប្រតិបត្តិការនេះ។
ការចុះអនុស្សរណយោគយល់គ្នាលើកនេះនឹងជួយអោយស្ថាប័នទាំងពីរ អាចធ្វើការជាមួយគ្នាដើមី្បពង្រឹងកិច្ចសហប្រតិបត្តការអោយកាន់តែប្រសើរជាងមុន និងអាចបោះពុម្ពអត្ថបទវិទ្យាសាស្រ្តរួមគ្នា ដើម្បីចូលរួមចំណែក ក្នុងការជួយអភិរក្សនិង ការពារបេតិកភណ្ឌជាតិនិងពិភពលោក។
