(ITC-Phnom Penh)៖ នារសៀលថ្ងៃទី២៩ ខែកុម្ភៈ ឆ្នាំ២០២៤ វិទ្យាស្ថានបច្ចេកវិទ្យាកម្ពុជា(សាលាតិចណូ) បានស្វាគមន៍គណៈប្រតិភូជាន់ខ្ពស់មកពី ប្រទេស Liechtenstein ដើម្បីពិភាក្សាអំពីកិច្ចសហប្រតិបត្តិការដ៏មានសក្តានុពលក្នុងការជំរុញការអប់រំ STEM ។ គណៈប្រតិភូដឹកនាំដោយលោកជំទាវ Dominique Hasler រដ្ឋមន្ត្រីក្រសួងការបរទេស អប់រំ និងកីឡា និងអមដំណើរដោយលោក Panagiotis Potolidis-Beck ប្រធានផ្នែកសហប្រតិបត្តិការ និងអភិវឌ្ឍន៍អន្តរជាតិមនុស្សធម៌ និងលោក Pius Frick អ្នកសម្របសម្រួលប្រចាំប្រទេសកម្ពុជា សេវាកម្មអភិវឌ្ឍន៍របស់ Liechtenstein។
នៅពេលមកដល់ គណៈប្រតិភូបានទទួលការស្វាគមន៍យ៉ាងកក់ក្តៅដោយឯកឧត្តមសាស្រ្តាចារ្យ ប៉ូ គឹមថូ នាយកវិទ្យាស្ថានបច្ចេកវិទ្យាកម្ពុជា និងសហការី។ យើងបានបង្ហាញជូនភ្ញៀវសមិទ្ធិផលរបស់សាលាតិចណូ តាមរយៈផ្ទាំងរូបភាព និងគំរូដែលដាក់តាំងនៅក្នុងសាលពិព័រណ៍។
របៀបវារៈនៃថ្ងៃនោះរួមមាន ដំណើរទស្សនៈកិច្ចនៅបរិវេណសាលាតិចណូ ដោយអញ្ជើញទស្សនា៖ ១) Smart Grid Laboratory; ២) Automation Laboratory និងកិច្ចប្រជុំដើម្បីពិភាក្សាអំពីការចូលរួមរបស់ LED ជាមួយ ITC។
លោកបណ្ឌិត ប៊ុន គឹមងុន បានធ្វើបទបង្ហាញអំពីទិដ្ឋភាពទូទៅនៃសកម្មភាពសិក្សា ការស្រាវជ្រាវ និងកិច្ចសហការនៅវិទ្យាស្ថាន។ គណៈប្រតិភូមានឱកាសទទួលបានការយល់ដឹងអំពីការប្តេជ្ញាចិត្តរបស់វិទ្យាស្ថានចំពោះឧត្តមភាពក្នុងវិស័យអប់រំ និងការស្រាវជ្រាវដ៏ទំនើប។
រីឯលោកស្រីបណ្ឌិត គីណាឡេត វង្សចាន់ ប្រធានកម្មវិធីសម្រាប់កម្មវិធីគ្រប់គ្រងថាមពលកម្ពុជា និងបណ្តុះបណ្តាលសវនករ (CEMAT) ក៏បានធ្វើបទបង្ហាញលម្អិតអំពីកម្មវិធីនេះ ដោយគ្របដណ្តប់ស្ថានភាពបច្ចុប្បន្ន និងកន្លែងបណ្តុះបណ្តាល។ លោកស្រីបណ្ឌិតក៏បានលើកឡើងយ៉ាងជាក់លាក់នូវគំនិតផ្តួចផ្តើមនាពេលខាងមុខ ក្នុងគោលបំណងធ្វើឱ្យប្រសើរឡើងនូវកន្លែងបណ្តុះបណ្តាល CEMAT និងការលើកកម្ពស់ធនធានមនុស្ស តាមរយៈការគាំទ្រពី LED ។
គោលបំណងចម្បងនៃដំណើរទស្សនកិច្ចនេះគឺដើម្បីពង្រឹងការយល់ដឹងអំពីសាលាតិចណូនិងតួនាទីរបស់គ្រឹះស្ថាននេះក្នុងវិស័យអប់រំ។ ការផ្តោតសំខាន់លើការអប់រំ និងបណ្តុះបណ្តាលធនធានមនុស្ស។ លើសពីនេះ ការពិភាក្សាក៏ផ្តោតផងដែរលើផែនការដើម្បីបណ្តុះចំណាប់អារម្មណ៍លើ STEM (វិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា) ក្នុងចំណោមសិស្សវ័យក្មេង។
គណៈប្រតិភូបានលើកឡើងពីសារៈសំខាន់នៃការអប់រំ STEM ដោយសរសើរសាលាតិចណូ សម្រាប់វិធីសាស្រ្តតម្រង់ទិសល្អក្នុងវិស័យ STEM ទាំងកម្រិតឧត្តម និងមធ្យមសិក្សា។ កិច្ចខិតខំប្រឹងប្រែងរួមគ្នារវាង Liechtenstein និងប្រទេសកម្ពុជា គឺជាជំហានឆ្ពោះទៅរកការលើកកម្ពស់ក្របខ័ណ្ឌអប់រំ STEM ដែលមានតុល្យភាព និងរឹងមាំ។
