Author: SIENG Chamroeun

នាព្រឹកថ្ងៃសុក្រ ៧រោច ខែ​ភទ្របទ ឆ្នាំ​ថោះ​ បញ្ច​ស័ក​ ព.ស.២៥៦៧​ ត្រូវ​នឹង​ថ្ងៃ​ទី ៦ ខែតុលា​​ ឆ្នាំ​២០២៣​ វិទ្យាស្ថានបច្ចេកវិទ្យាកម្ពុជាបានប្រារព្ធពិធីបើកបវេសនកាលឆ្នាំសិក្សា២០២៣-២០២៤ សម្រាប់​និស្សិត​ឆ្នាំ​ទី​៣,​ ៤​ និង​ទី​៥​ ដែលមាននិស្សិតចូលរួម​សរុប​ចំនួនប្រមាណ ២០០០នាក់  ក្រោមអធិបតីភាពរបស់ ឯកឧត្តមសាស្រ្តាចារ្យបណ្ឌិត ប៉ូ គឹមថូ នាយកវិទ្យាស្ថានបច្ចេកវិទ្យាកម្ពុជា នៅសាលសហសិក្សា សម្ដេចអគ្គមហាសេនាបតីតេជោ ហ៊ុន សែន។

• 

• 

• 

• 

• 

• 

• 

• 

• 

• 

(ITC-Phnom Penh)៖ នាព្រឹកថ្ងៃទី២ ខែតុលា ឆ្នាំ២០២៣ ឯកឧត្តមសាស្រ្តាចារ្យ ប៉ូ គឹមថូ បានអញ្ជើញចូលរួម ក្នុងពិធីដាក់ដំណើរការជាផ្លូវការនៃ “កម្មវិធីអភិវឌ្ឍន៍ជំនាញឌីជីថល” និងពិធីចុះហត្ថលេខាលើអនុស្សរណៈនៃការយោគយល់គ្នា ស្តីពីកិច្ចសហប្រតិបត្តិការលើការលើកកម្ពស់ការយល់ដឹង និងការជំរុញការអភិវឌ្ឍជំនាញឌីជីថល រវាង ក្រសួងប្រៃសណីយ៍និងទូរគមនាគមន៍ (ក.ប.ទ.) និងគ្រឹះស្ថានឧត្តមសិក្សាដៃគូចំនួន៦៖ បណ្ឌិត្យសភាបច្ចេកវិទ្យាឌីជីថលកម្ពុជា សាកលវិទ្យាល័យភូមិន្ទភ្នំពេញ សាកលវិទ្យាល័យជាតិគ្រប់គ្រង វិទ្យាស្ថានបច្ចេកវិទ្យាកម្ពុជា សាកលវិទ្យាល័យអាមេរិកាំងភ្នំពេញ និងសាកលវិទ្យាល័យផារ៉ាហ្គន ព្រមទាំងមានការអញ្ជើញចូលរួមពីឯកឧត្ដម លោកជំទាវ ជាថ្នាក់ដឹកនាំ មន្រ្តីរាជការ អង្គភាពចំណុះ ក.ប.ទ. តំណាងគ្រឹះស្ថានឧត្ដមសិក្សាដៃគូទាំង៦ខាងលើ តំណាងវិស័យឯកជន និងអង្គភាពសារព័ត៌មាន ដែលមានចំនួនសរុបប្រមាណ ៣០០នាក់ ។

កម្មវិធីនេះត្រូវបានរៀបចំឡើង នៅទីស្តីការក្រសួងប្រៃសណីយ៍និងទូរគមនាគមន៍ ក្រោមអធិបតីភាពដ៏ខ្ពង់ខ្ពស់ពី ឯកឧត្តម ជា វ៉ាន់ដេត រដ្ឋមន្រ្តីក្រសួងប្រៃសណីយ៍និងទូរគមនាគមន៍។

នៅក្នុងឱកាសនោះ លោកជំទាវ ហ៊ាន ប៉ូលីណេ អនុរដ្ឋលេខាធិការ ក.ប.ទ. បានជម្រាបជូនអំពីសាវតារនៃការបង្កើត “កម្មវិធីអភិវឌ្ឍន៍ជំនាញឌីជីថល” (ក.អ.ជ.ឌ.) និងមានឈ្មោះជាភាសាអង់គ្លេសថា “Digital Skill Development Program” (DSDP) ក្នុងកម្មវត្ថុចម្បងចំនួន៣ ដែលរួមមាន៖ (១) ការចូលរួមអនុវត្តក្របខណ្ឌគោលនយោបាយសេដ្ឋកិច្ចនិងសង្គមឌីជីថលកម្ពុជា ២០២១-២០៣៥ និងគោលនយោបាយរដ្ឋាភិបាលឌីជីថលកម្ពុជា 2022-2035 (២) ការលើកកម្ពស់ស្តង់ដាគុណវុឌ្ឍិនៃការអប់រំលើមុខជំនាញដែលទាក់ទងនឹងបច្ចេកវិទ្យាឌីជីថល និង (៣) ការគាំទ្រដល់ដំណើរការអភិវឌ្ឍមូលធនមនុស្សឌីជីថល តាមរយៈការផ្តល់ថវិកាសម្រាប់ការអភិវឌ្ឍជំនាញឌីជីថល និងប្រើប្រាស់បច្ចេកវិទ្យាឌីជីថលបម្រើដល់ការអប់រំ។ បន្ថែមលើនេះ ឯកឧត្តម ហោ ប៉េង សាកលវិទ្យាធិការនៃសាកលវិទ្យាល័យជាតិគ្រប់គ្រង បានលើកឡើងថា ក្នុងនាមជាតំណាងគ្រឹះស្ថានឧត្តមសិក្សាដៃគូទាំង៦របស់ ក.ប.ទ. ដែលឆ្លុះបញ្ជាំងពីការប្តេជ្ញារបស់គ្រឹះស្ថានឧត្តមសិក្សាដៃគូ ក្នុងការចូលរួមលើកកម្ពស់កិច្ចសហប្រតិបត្តិការជាមួយក្រសួង លើការបន្តជំរុញការអប់រំពាក់ព័ន្ធនឹងជំនាញឌីជីថលនៅកម្ពុជា។

ថ្លែងក្នុងឱកាសនោះដែរ ឯកឧត្តមរដ្ឋមន្ត្រី ជា វ៉ាន់ដេត បានមានប្រសាសន៍ ដើម្បីកសាងរដ្ឋាភិបាលឌីជីថល សេដ្ឋកិច្ចឌីជីថល សង្គមឌីជីថល និងពលរដ្ឋឌីជីថល ស្របតាមយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាល ការបង្កើនការអភិវឌ្ឍធនធានមនុស្សជំនាញឌីជីថល គឺជាតម្រូវការចាំបាច់ដែលមិនអាចខ្វះបាន និងមានសារៈសំខាន់ណាស់សម្រាប់ប្រទេសកម្ពុជា ក្នុងការបោះជំហានឱ្យក្លាយជាប្រទេសដែលមានសេដ្ឋកិច្ចឌីជីថល និងរដ្ឋបាលឌីជីថលប្រកបដោយប្រសិទ្ធភាពខ្ពស់។ ស្របជាមួយគ្នានេះ ឯកឧត្តមរដ្ឋមន្ត្រី បានបន្តថា ក.ប.ទ. បានបង្កើត “កម្មវិធីអភិវឌ្ឍន៍ជំនាញឌីជីថល” ដែលកម្មវិធីនេះ នឹងអនុញ្ញាតឱ្យសិស្សដែលមិនមានលទ្ធភាពបង់ថ្លៃសិក្សា អាចស្នើសុំថវិកាសិក្សាដែលមិនគិតការប្រាក់ សម្រាប់សិក្សាថ្នាក់បរិញ្ញាបត្រលើជំនាញបច្ចេកវិទ្យាឌីជីថល នៅគ្រឹះស្ថានឧត្តមសិក្សាដៃគូរបស់កម្មវិធី។ និស្សិតត្រូវទូទាត់មកវិញនូវ ២០% នៃបៀវត្សប្រចាំខែ នៅពេលដែលខ្លួនចេញធ្វើការនិងទទួលបានបៀវត្សចាប់ពី ៥០០ដុល្លារអាម៉េរិកឡើងទៅ ដើម្បីទ្រទ្រង់និរន្តរភាពនៃកម្មវិធីសម្រាប់និស្សិតជំនាន់ក្រោយ។ ឯកឧត្តមរដ្ឋមន្ត្រី បានបន្ថែមថា កិច្ចសហប្រតិបត្តិការរវាង ក.ប.ទ. និងគ្រឹះស្ថានឧត្ដមសិក្សាដៃគូលើថវិកាសិក្សា គឺជាវឌ្ឍនភាពបន្ថែមថ្មីមួយទៀតរបស់ក្រសួង ក្នុងការបន្តអភិវឌ្ឍធនធានមនុស្សលើវិស័យបច្ចេកវិទ្យាឌីជីថល និងផែនការអភិវឌ្ឍមូលធនមនុស្ស ដែលចូលរួមចំណែកដល់ការធ្វើបរិវត្តកម្មឌីជីថល។

ឆ្លៀតក្នុងឱកាសនោះ ឯកឧត្តមរដ្ឋមន្ត្រី បានបញ្ជាក់ថា ការលើកកម្ពស់ការអប់រំលើជំនាញបច្ចេកវិទ្យាឌីជីថលប្រកបដោយគុណភាព ជាយុទ្ធសាស្រ្តដ៏សំខាន់មួយនៃបេសកកម្មរបស់ ក.ប.ទ. ក្នុងការធ្វើបរិវត្តកម្មឌីជីថលបម្រើដល់ការអប់រំនៅកម្ពុជា។ ឯកឧត្តមរដ្ឋមន្ត្រី ជឿជាក់យ៉ាងមុតមាំថា កម្មវិធីអភិវឌ្ឍន៍ជំនាញឌីជីថលនឹងទទួលបានជោគជ័យ ហើយផ្តល់ផ្លែផ្កាត្រលប់មកវិញនូវមូលធនមនុស្សឌីជីថល ដែលជាកម្លាំងសកម្មក្នុងការកសាងសេដ្ឋកិច្ចនិងសង្គមឌីជីថល ឆ្ពោះទៅសម្រេចចក្ខុវិស័យកម្ពុជាឆ្នាំ២០៥០ ក្រោមការដឹកនាំប្រកបដោយគតិបណ្ឌិតរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។

ក.ប.ទ. សូមលើកទឹកចិត្តដល់សិស្សនិស្សិតទាំងអស់ ដែលមានតម្រូវការស្នើសុំហិរញ្ញប្បទានសិក្សាពីកម្មវិធីអភិវឌ្ឍន៍ជំនាញឌីជីថល អាចទំនាក់ទំនងតាមរយៈលេខទូរសព្ទ ០៩៨ ៩៤៣ ៧៧៧ ឬគេហទំព័រ www.dsdp.gov.kh ឬតាមដានហ្វេសប៊ុកផ្លូវការឈ្មោះ “កម្មវិធីអភិវឌ្ឍន៍ជំនាញឌីជីថល” ឬ ស្កេន QR Code ខាងក្រោម។

• 

• 

• 

• 

• 

• 

(ITC-Phnom Penh)៖ នាព្រឹកថ្ងៃទី២១ ខែកញ្ញា ឆ្នាំ២០២៣ ឯកឧត្តមបណ្ឌិត អ៊ុម រម្យណី រដ្ឋលេខាធិការក្រសួង អប់រំ យុវជន និងកីឡា បានអញ្ជើញជាអធិបតីក្នុងសន្និសីទថ្នាក់តំបន់លើកទី១៤ និងសន្និសីទថ្នាក់អន្តរជាតិលើកទី២ ក្រោមប្រធានបទរួម៖វិស្វកម្មធនធានរ៉ែ និងភូគព្ភសាស្ត្រ សម្រាប់ផែនដីប្រកបដោយនិរន្តរភាព ។

ជាកិច្ចចាប់ផ្តើមឯកឧត្តមសាស្រ្តាចារ្យ ប៉ូ គឹមថូ បានស្វាគមន៍ និងថ្លែងអំណរគុណដល់ក្រសួងអប់រំ យុវជន និងកីឡា អង្គការ JICA ក៏ដូចជាភ្ញៀវជាតិនិងអន្តរជាតិ ទាំងអស់ដែលតែងតែគាំទ្រនិងចូលរួមយ៉ាងសកម្មក្នងការអភិវឌ្ឃនិងស្រាវជ្រាវផ្នែកវិស្វកម្មធនធានរ៉ែ និងភូគព្ភសាស្ត្រ។ ឯកឧត្តមបានបញ្ជាក់បន្ថែមថា ៖ «ជាមួយនឹងការផ្តួចផ្តើមគំនិតពី JICA, ITC, ក្រសួងអប់រំ យុវជន និងកីឡា និង ក្រសួងវប្បធម៌ និងវិចិត្រសិល្បៈ ភូគព្ភឧទ្យាន (geopark) ដំបូងគេក្នុងប្រទេសកម្ពុជានាពេលអនាគត អាចនឹងត្រូវរៀបចំបង្កើតឡើងនៅក្នុងខេត្តសៀមរាប។

ចំណែកប្រសាសន៍របស់ឯឧត្តមរដ្ឋលេខាធិការវិញក៏មានអត្ថន័យតែមួយ៖ «ដោយទទួលស្គាល់ពីតម្លៃនៃសកម្មភាពស្រាវជ្រាវផ្នែកធនធានរ៉ែ និងភូគព្ភសាស្ត្រ ជាមួយនឹងភាពជឿនលឿនផ្នែកបច្ចេកវិទ្យានិងវិស្វកម្ម ក្រសួងអប់រំ យុវជន និងកីឡា វាយតម្តែខ្ពស់ និងផ្តល់ការគាំទ្រដល់កិច្ចការទាំងនេះ និងសង្ឃឹមថាលទ្ធផលនៃសកម្មភាពស្រាវជ្រាវទាំងនេះពិតជានឹងបម្រើជាយោជន៍ដ៏មានតម្លៃសម្រាប់ការប្រើប្រាស់នាពេលអនាគត របស់រាជរដ្ឋាភិបាល និង វិស័យឯកជន»។

គួរដឹងថាវិទ្យាស្ថានបច្ចេកវិទ្យាកម្ពុជា (ITC) ដោយមានការសហការជាមួយទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន ហៅកាត់ថា (JICA) បានរៀបចំសន្និសីទថ្នាក់តំបន់លើកទី១៤, The 14th AUN/SEED-Net Regional Conference on Geological and Geo-resources Engineering (RCGeoE) និងសន្និសីទថ្នាក់អន្តរជាតិលើកទី២, The 2nd International Conference on Earth Resources and Geo-Environment Technology 2023 (EraGET2023) ក្រោមប្រធានបទរួម “Geo-resources and Geological Engineering for Sustainable Earth”នៅថ្ងៃទី ២១ ដល់ ២២ ខែកញ្ញា ឆ្នាំ២០២៣។

មហាវិទ្យាល័យរ៉ែ និងភូគព្ភសាស្រ្តនៃវិទ្យាស្ថានបច្ចេកវិទ្យាកម្ពុជាគឺជាអ្នករៀបចំសន្និសីទនេះក្នុងគោលបំណង៖ បង្កើតជាកន្លែងសម្រាប់ផ្តល់ឳកាសឲ្យអ្នកស្រាវជ្រាវ និងនិស្សិតវិស្វកម្មកម្ពុជា ជាពិសេសវិស្វកម្មធនធានរ៉ែ និងភូគព្ភសាស្រ្ត បានចូលរួម និងចែករំលែកលទ្ធផលស្រាវជ្រាវថ្មីៗ ជាមួយសាស្រ្តាចារ្យ អ្នកស្រាវជ្រាវ និស្សិតជាតិ និងអន្តរជាតិ និងជាមួយស្ថាប័នសិក្សា ក្រសួង និងក្រុមហ៊ុននានា។ ជាមួយគ្នានេះដែរ អ្នកចូរួមទាំងអស់ក៏មានឱកាសរៀន ទទួលបទពិសោធន៍ពីគ្នាទៅវិញទៅមក និងឱកាសបង្កើតនិងបង្កើនការទំនាក់ទំនង។ ក្នុងឆ្នាំនេះវិទ្យាស្ថានបានរៀបចំសន្និសីទនេះ ដោយទទួលបានជោគជ័យគួរជាទៅមោទនៈ ដែលមានការចូរួមធ្វើបទបង្ហាញចំនួន ១១៥ប្រធានបទ ពីសំណាក់សាស្រ្តាចារ្យ អ្នកស្រាវ និស្សិតជាតិ និងអន្តរជាតិ អ្នកជំនាញពីក្រសួង និងក្រុមហ៊ុនដូចជា វិទ្យាស្ថានបច្ចេកវិទ្យាកម្ពុជា ក្រសួងរ៉ែ និងថាមពល ក្លឹបស្តែមកម្ពុជា Kyushu University, The University of Tokyo, Waseda University នៃប្រទេសជប៉ុន University of the Philippines Diliman, Caraga State University Chulalongkorn University, Chiangmai University, Thammasat University, Songkla University នៃប្រទេសថៃ, Universiti Sains Malaysia (USM) នៃប្រទេសម៉ាឡេស៊ី, Universitas Indonesia Depok,នៃប្រទេសឥណ្ឌូនេស៊ី Yangon University, University of Magway នៃប្រទេសមីយ៉ាន់ម៉ា និងក្រុមហ៊ុន NIPPON KOEI CO., LTD, Renaissance Minerals (Cambodia) Limited, MERNAD Cambodia, Geo Pro Co., Ltd។

គួររំលឹកផងដែរថានេះជាលើកទី២ហើយ ដែលមហាវិទ្យាល័យរ៉ែ និងភូគព្ភសាស្រ្ត នៃវិទ្យាស្ថានបច្ចេកវិទ្យាកម្ពុជា បានរៀបចំសន្និសីទថ្នាក់តំបន់ RCGeoE ជាលើកទី២ និងលើកទី១បានធ្វើឡើងក្នុងឆ្នាំ២០១៧។ ហើយក៏ជាលើកទីពីរដែរ ដែលមហាវិទ្យាល័យរ៉ែ និងភូគព្ភសាស្រ្តបានបង្កើតសិន្និសីទអន្តរជាតិផ្ទាល់ខ្លួនដែលហៅកាត់ថា EraGET និងបានរៀបចំលើកទី១ ដោយជោគជ័យក្នុងខែកុម្ភៈ ឆ្នាំ២០២២ ដោយមានការចូលរួមពី ១៤ សាកលវិទ្យាល័យ និងស្ថាប័នជាតិ និងអន្តរជាតិ។

សន្និសីទនាឆ្នាំនេះក៏ទទួលបានការឧបត្ថម្ភពីក្រុមហ៊ុន៖ MGS Soil Improvement Co., Ltd, Renaissance Minerals (Cambodia) Limited, Dynamic Scientific, Laber Scientific, N.V.C Corporation Co., Ltd (Vital Premium Water) ។

• 

• 

• 

• 

• 

• 

• 

• 

• 

• 

• 

(ITC-Phnom Penh)៖ ភ្នំពេញ ថ្ងៃទី២២ ខែកញ្ញា ឆ្នាំ២០២៣ – ថ្ងៃនេះ កម្ពុជា និងអូស្ត្រាលី បានចាប់ផ្តើមភាពជាដៃគូថ្មី ដើម្បីគាំទ្រដល់សហគ្រាសធុនតូច និងមធ្យម (SMEs) នៃកសិ-អាហាររបស់កម្ពុជា ដោយផ្តល់ជំនួយផ្នែកហិរញ្ញវត្ថុដល់សហគ្រាសធុនតូច និងមធ្យមចំនួន១៥ ដើម្បីអភិវឌ្ឍផលិតផលថ្មី កែលម្អទីផ្សាររបស់ពួកគេ ឬ បំពេញតាមស្តង់ដារសុវត្ថិភាពចំណីអាហារ។

ឯកឧត្តមសាស្រ្តាចារ្យ ប៉ូ គឹមថូ នាយកវិទ្យាស្ថានបច្ចេកវិទ្យាកម្ពុជា បានមានប្រសាសន៍ថា៖ “ផលិតផលម្ហូបអាហារដែលអាចអនុលោមតាមស្តង់ដារជាតិ និងអន្តរជាតិ និងត្រៀមខ្លួនជាស្រេចដើម្បីឈានជើងទៅកាន់ទីផ្សារក្នុងតំបន់ និងអន្តរជាតិ”។ ក្នុងន័យនេះ ការទាញយកវិស័យឯកជន ឱ្យមកសហការជាមួយគ្រឹះស្ថានឧត្តមសិក្សា ដើមី្បផលិតម្ហូបអាហារ ឱ្យឆ្លើយតបនឹងបទដ្ឋានជាតិនិងអន្តរជាតិ គឺជារឿងដែលមិនត្រូវមើលរំលង។

ភាពជាដៃគូនេះត្រូវបានផ្តល់មូលនិធិដោយរដ្ឋាភិបាលអូស្ត្រាលីតាមរយៈ Cambodia Australia Partnership for Resilient Economic Development (CAPRED) និងដោយក្រសួងសេដ្ឋកិច្ច និងហិរញ្ញវត្ថុ (MEF) តាមរយៈសហគ្រិនខ្មែរ (KE)។

ឯកអគ្គរដ្ឋទូតអូស្ត្រាលីប្រចាំកម្ពុជា មានប្រសាសន៍ថា “ការអភិវឌ្ឍន៍សហគ្រាសធុនតូច និងមធ្យម ជាពិសេសផ្នែកដែលគ្រប់គ្រងដោយស្ត្រី គឺជាផ្នែកមួយដ៏សំខាន់នៃការប្តេជ្ញាចិត្តរបស់ប្រទេសអូស្ត្រាលីក្នុងការគាំទ្រដល់ការអភិវឌ្ឍវិស័យកសិកម្មដ៏រស់រវើក រួមចំណែកដល់កំណើនសេដ្ឋកិច្ចប្រកបដោយនិរន្តរភាព និងបរិយាប័ន្ននៅកម្ពុជា”។ 

“យើងជឿជាក់ថាមូលនិធិនេះតាមរយៈ CAPRED នឹងជួយជំរុញការបង្កើតថ្មី និងការចូលប្រើប្រាស់ទីផ្សារក្នុងវិស័យនេះ និងបង្កើតឱកាសវិនិយោគថ្មីៗសម្រាប់អាជីវកម្មកម្ពុជា។ ជាលទ្ធផល ផលិតផលដែលមានគុណភាពខ្ពស់នឹងត្រូវបានផលិតសម្រាប់ទីផ្សារក្នុងស្រុក និងអន្តរជាតិ»។

ភាពជាដៃគូនេះក៏នឹងទាក់ទាញអ្នកជំនាញនៃស្ថាប័នសិក្សាចំនួន ៤ រួមមាន៖ វិទ្យាស្ថានបច្ចេកវិទ្យាកម្ពុជា (ITC), សាកលវិទ្យាល័យភូមិន្ទកសិកម្ម (RUA), សាកលវិទ្យាល័យជាតិបាត់ដំបង (NUBB), និងវិទ្យាស្ថានបច្ចេកវិទ្យាកំពង់ស្ពឺ (KSIT)។ 

ឯកឧត្ដមបណ្ឌិត ឈៀង វណ្ណមុនិណ្ឌ នាយកប្រតិបត្តិសហគ្រិនខ្មែរ មានប្រសាសន៍ថា “យើងពិតជារំភើបក្នុងការចាប់ដៃគូម្តងទៀតជាមួយប្រទេសអូស្ត្រាលីតាមរយៈ CAPRED និងសាកលវិទ្យាល័យចំនួនបួននៅលើគំនិតផ្តួចផ្តើមដ៏សំខាន់នេះ”។

“មូលនិធិនេះនឹងជួយកម្រិតទីផ្សារសម្រាប់សហគ្រាសធុនតូច និងមធ្យមនៅកម្ពុជា និងផ្តល់ឱ្យពួកគេនូវធនធានដែលពួកគេត្រូវការដើម្បីទទួលបានជោគជ័យ។ គំនិតផ្តួចផ្តើមនេះក៏នឹងជួយលើកកម្ពស់វិស័យកសិ-អាហារ ម៉ាកផលិតផលកសិ-អាហារ និងស្តង់ដារនៅក្នុងប្រទេសកម្ពុជាផងដែរ»។

ភាពជាដៃគូនេះបង្កើតឡើងនៅលើភាពជោគជ័យនៃគំនិតផ្តួចផ្តើមពីមុន ដែលបានគាំទ្រសហគ្រាសធុនតូច និងមធ្យមចំនួន២២ ក្នុងរយៈពេលពីរឆ្នាំ។ ភាពជាដៃគូថ្មីនេះមានគោលបំណងគាំទ្រដល់សហគ្រាសធុនតូច និងមធ្យមកាន់តែទូលំទូលាយ និងផ្តល់ការគាំទ្រយ៉ាងទូលំទូលាយបន្ថែមទៀត។

“យើងបានរៀនច្រើនពីគំនិតផ្តួចផ្តើមពីមុនរវាង KE, Australia, ITC, ហើយខ្ញុំជឿជាក់យ៉ាងមុតមាំថាយើងនឹងទាញផលចំណេញពីទីនោះ។ ITC ពិតជានឹងផ្តល់ការគាំទ្រ និងការសម្របសម្រួលដល់សាកលវិទ្យាល័យថ្មីទាំងបីក្នុងភាពជាដៃគូ។

លំហូរការងារទាំងបីនៃភាពជាដៃគូគឺ៖

• មូលនិធិនវានុវត្តន៍ម្ហូបអាហារ៖ នេះនឹងផ្តល់ការគាំទ្រផ្នែកហិរញ្ញវត្ថុដល់សហគ្រាសធុនតូច និងមធ្យម ដើម្បីអភិវឌ្ឍផលិតផលថ្មី កែលម្អទីផ្សាររបស់ពួកគេ ឬបំពេញតាមស្តង់ដារសុវត្ថិភាពចំណីអាហារ។

• វិស័យសេវាកម្មច្នៃប្រឌិតម្ហូបអាហារ៖ នេះនឹងក្លាយជាគំរូមួយដើម្បីជួយដល់សហគ្រាសធុនតូច និងមធ្យម ក្នុងការទទួលបានសេវាកម្មម្ហូបអាហារ និងបច្ចេកវិទ្យា ដូចជាការកែច្នៃម្ហូបអាហារ បច្ចេកវិទ្យា ព័ត៌មានទីផ្សារ ម៉ាកយីហោ និងការវេចខ្ចប់។

• Agri-Food Innovation Summit៖ នេះនឹងក្លាយជាព្រឹត្តិការណ៍ប្រចាំឆ្នាំដែលប្រមូលផ្តុំសហគ្រាសធុនតូច និងមធ្យម អ្នកស្រាវជ្រាវ និងអ្នកពាក់ព័ន្ធផ្សេងទៀត ដើម្បីចែករំលែកចំណេះដឹង និងគំនិតអំពីការច្នៃប្រឌិតម្ហូបអាហារ។

ភាពជាដៃគូនេះត្រូវបានគេរំពឹងថានឹងមានឥទ្ធិពលយ៉ាងសំខាន់លើវិស័យកសិ-ម្ហូបអាហារកម្ពុជា តាមរយៈការបង្កើតការងារថ្មី ការកែលម្អគុណភាព និងសុវត្ថិភាពនៃផលិតផលម្ហូបអាហារ និងការជំរុញការនាំចេញ។

នេះគឺជាគំនិតផ្តួចផ្តើមមួយក្នុងចំណោមគំនិតផ្តួចផ្តើមជាច្រើនដែល CAPRED កំពុងគាំទ្រដើម្បីលើកកម្ពស់កំណើនសេដ្ឋកិច្ច និងការអភិវឌ្ឍន៍នៅកម្ពុជា។ កម្មវិធីនេះត្រូវបានផ្តល់ហិរញ្ញប្បទានដោយរដ្ឋាភិបាលអូស្ត្រាលី និងមានគោលបំណងជួយដល់ប្រទេសកម្ពុជាក្នុងការអភិវឌ្ឍសេដ្ឋកិច្ចដែលធន់ទ្រាំ រួមបញ្ចូល និងនិរន្តរភាព ដែលសមភាពយេនឌ័រ ពិការភាព ការដាក់បញ្ចូលក្នុងសង្គម ភាពធន់នឹងអាកាសធាតុ និងការការពារត្រូវបានដាក់បញ្ចូលទៅក្នុងសកម្មភាពទាំងអស់។

• 

• 

• 

• 

• 

• 

• 

• 

• 

• 

នាព្រឹកថ្ងៃទី១៣ ខែកញ្ញា ឆ្នាំ២០២៣ លោកនាយករង សូយ ទី បានទទួលជួបពិភាក្សាការងារជាមួយ លោក ZHAO YU គ្រូបង្រៀនឯកទេសប្រចាំការនៅកម្ពុជា នៃមជ្ឈមណ្ឌលសហប្រតិបត្តិការនិងផ្លាស់ប្តូរភាសាចិនភាសាបរទេស នៃក្រសួងអប់រំប្រទេសចិន។

ភាគីចិនបានវាយតម្លៃខ្ពស់ចំពោះការរីកចំរោះននៃវិស្ថានបច្ចេកវិទ្យាកម្ពុជា (សាលាតិចណូ) និងមានបំណងចង់សហការជាមួយគ្នា ដើមី្បបម្រើឱ្យផលប្រយោជន៍គ្នាទៅវិញទៅមក។

គោលបំណងសំខាន់នៃជំនួបនេះគឺសមភាគីមានបំណងជម្រាបជូនថ្នាក់ដឹកនាំសាលាតិចណូពីវិសាលភាពនៃភាសាចិនដែលកំពង់ដើរតួនាទីសំខាន់ នៅក្នុងប្រទេសកម្ពុជា និងចង់ពង្រឹងភាសាចិននៅកម្រិតឧត្តមសិក្សា។ គួរបញ្ជាក់ថា បើតាមទិន្នន័យក្រសួងអប់រំ យុវជន និងកីឡាកម្ពុជា បច្ចុប្បន្ននេះ មានគ្រឹះស្ថានអប់រំចំនួនលើសពី១០០ ដែលមានបើកវគ្គបណ្តុះបណ្តាលភាសាចិននៅក្នុងព្រះរាជាណាចក្រកម្ពុជា និងមានចំនួនសិស្ស-និស្សិតលើសពី ១០ ម៉ឺននាក់ដែលកំពុងសិក្សាភាសាចិន។ ប៉ុន្មានឆ្នាំចុងក្រោយនេះ មជ្ឈមណ្ឌលសហប្រតិបត្តិការ និងផ្លាស់ប្តូរភាសាចិនភាសាបរទេស បានផ្តល់ជំនួយដល់រាជបណ្ឌិត្យសភាកម្ពុជាក្នុងការបង្កើតវគ្គបណ្តុះបណ្តាលជំនាញគរុកោសល្យភាសាចិនថ្នាក់បរិញ្ញាបត្រ និងថ្នាក់បរិញ្ញាបត្រជាន់ខ្ពស់ ព្រមទាំងផ្តល់ការគាំទ្រដល់ការបណ្តុះបណ្តាលគ្រូបង្រៀនភាសាចិននៅកម្ពុជា។ អ្វីដែលគួរឱ្យចាប់អារម្មណ៍មួយទៀតនោះគឺ កាលពីថ្ងៃទី៩ ខែវិច្ឆិកា ឆ្នាំ២០២២ ភាគីកម្ពុជា និងភាគីចិន បានចុះ “អនុស្សរណៈនៃការយោគយល់គ្នាជាមួយក្រសួងអប់រំប្រទេសចិន ស្តីពីការអភិវឌ្ឍកម្មវិធីរៀនភាសាចិន នៅតាមគ្រឹះស្ថានមធ្យមសិក្សាសាធារណៈនៅកម្ពុជា” ដែលជាសញ្ញាមួយបង្ហាញឱ្យឃើញថាកម្ពុជាបានចាប់ផ្តើមដាក់បញ្ជូលការអប់រំភាសាចិនទៅក្នុងប្រព័ន្ធអប់រំជាតិកម្ពុជាជាផ្លូវការ។

ពាក់ព័ន្ធនឹងរឿងនេះ លោកនាយករង បានអរគុណដល់ភាគីមិត្ត និងបានបញ្ជាក់ថាសាលាតិចណូមានដៃគូជាមួយសាកលវិទ្យាល័យចិនមួយចំនួន និងមាននិសិ្សតសាលាតិចណូខ្លះ បានទទួលបានអាហារូបករណ៍ទៅរៀននៅប្រទេសចិន។ ដូច្នេះពួកគាត់ពិតជាត្រូវការចេះភាសាចិន។ ក្នុងន័យនេះ ដើមី្បជួយដល់និសិ្សត និងរឹតចំណងមិត្តភាពដែកថែបកម្ពុជា-ចិន ជំហ៊ានដំបូងសាលាតិចណូអាចអនុញ្ញាតឱ្យបើកថ្នាក់សិក្សាជាលក្ខណៈការសិក្សាក្រៅម៉ោងពេលល្ងាចសម្រាប់និសិ្សតដែលមានការចាប់អារម្មណ៍និងចង់រៀន។

ដោយឡែកពាក់ព័ន្ធនឹងការបើកជាលក្ខណៈមជ្ឍមណ្ឌលសម្រាប់ភាសាចិន (Center for Chinese Language) លោកនាយករងសុំយកសំណើរនេះឆ្លងយោបល់គណៈគ្រប់គ្រងសាលាតិចណូសិន។

• 

• 

• 

(ITC-Tay Ninh/Vietnam)៖ តបតាមការអញ្ជើញរបស់លោកនាយកប្រតិបត្តិនៃក្រុមហ៊ុន Cart Tire Co., Ltd ដែលជាបុត្តសម្ព័ន្ធនៃក្រុមហ៊ុន Sailun Group ឯកឧត្តមសាស្រ្តាចារ្យ ប៉ូ គឹមថូ បានអញ្ជើញដឹកនាំគណៈប្រតិភូមួយនៃវិទ្យាស្ថានបច្ចេកវិទ្យាកម្ពុជា (សាលាតិចណូ) ទៅធ្វើទស្សនកិច្ចនៅក្រុមហ៊ុនផលិតសំបកកង់ឡានខ្នាតពិភពលោករបស់ប្រទេសចិន (Sailun) ដែលមានទីតាំងនៅខេត្តតាយនីញ (Tay Ninh) ក្នុងប្រទេសវៀតណាម។

លោក TIAN KEXU ប្រធានគ្រប់គ្រងធនធានមនុស្សរបស់ក្រុមហ៊ុន Sailun នៅក្នុងតំបន់អាស៊ីអាគ្នេយ៍ បានថ្លែងស្វាគមន៍គណៈប្រតិភូសាលាតិចណូ ដោយបានបញ្ជាក់ថាក្រុមហ៊ុន Sailun ពិតជាអរគុណណាស់ដល់សាលាតិចណូដែលតែងតែសហការយ៉ាងល្អចាប់តាំងពីយើងបានស្គាល់គ្នាមក។ ជាក់ស្តែងថ្ងៃនេះវត្តមានរបស់ឯកឧត្តមសាស្រ្តាចារ្យនាយក និងសហការី ពិតជាបញ្ជាក់ពីទំណាក់ទំនងល្អរវាងស្ថាប័នយើងទាំងពីរ។

ជាការឆ្លើយតបឯកឧត្តមសាស្រ្តាចារ្យនាយក បានថ្លែងអំណរចំពោះការទទួលយ៉ាងកក់ក្តៅពីសំណាក់ក្រុមហ៊ុន និងបានសន្យាថាសាលាតិចណូនិងពង្រីកសហប្រតិបត្តិការឱ្យលើសពីការគ្រាន់តែទទួលនិសិ្សតឱ្យធ្វើកម្មសិក្សានិងធ្វើការ។ ភាគីទាំងពីរបានយល់ព្រមថានឹងពង្រឹងការស្រាវជ្រាវរួមគ្នា ដើមិ្បឆ្លើយតបទៅនឹងតម្រូវការប្រគួតប្រជែង ក្នុងយុគ្គសម័យឌីជីថល និងបដិវត្តន៍ឧស្សាហកម្ម៤.០។ កិច្ចការនេះគឺជាអាទិភាពមួយនៃបេសកកម្មរបស់សាលាតិចណូគឺការផ្ទេរច្ចេកវិទ្យាទៅវិស័យឯកជន “Technology transfer to the private sector”។

សូមរំលឹកថ្មីថា Sailun នៅកម្ពុជា នាពេលបច្ចប្បន្ន អាចផលិតបានតែសំបកកង់ឡានធុនតូច (PCR-Passenger Car Radial tire) និង មធ្យម (TBR-Truck Bus Radial tire) រីឯ Sailun នៅវៀតណាមអាចផលិតបានទាំងបីប្រភេទ៖ តូច មធ្យម និង ធំ (OTR-Off-The-Road tire)។ ផលិតភាពនៃរោងចក្រនៅកម្ពុជាគឺ ៣០០០០សំបកកង់ ក្នុងមួយថ្ងៃ រីឯនៅវៀតណាម ៤៥០០០សំបកកង់ក្នុង១ថ្ងៃ (PCR+TBR=38000 និង OTR=7000)។
ពាក់ព័ន្ធនឹងចំនួនបុគ្គលិក Sailun Vietnam ប្រើប្រាស់បុគ្គលិកសរុបទាំងអស់ជា៦០០០នាក់ និង Sailun Cambodia ប្រមាណជិន២០០០នាក់។

យោងតាមការព្រមព្រៀងគ្នានៃថ្នាក់ដឹកនាំទាំងពីរភាគី រោងចក្រក្នុងសាលារៀន (une usine-école) មួយដែលអាចមានឈ្មោះថា៖ Salatechno-Sailun នឹងចាប់កំណើតនាពេលដ៏ខ្លីខាងមុខនៅក្នុងសាលាតិចណូ ក្នុងគោលបំណងពង្រឹងនិងពង្រីកសហប្រតិបត្តិការទ្វេរភាគី ជាពិសេសផ្តោតលើការស្រាវជ្រាវរួមគ្នា។

បើយោងតាមលោក JIANG RENSHUANG ប្រធានក្រុមហ៊ុន គោលនយោបាយនិងយុទ្ធសាស្រ្តរបស់ក្រុមហ៊ុន Sailun រាល់ប្រាំឆ្នាំម្តងក្រុមហ៊ុននឹងសាងសង់រោងចក្រថ្មីនៅកន្លែងផ្សេងទៀតនៅក្នុងប្រទេសកម្ពុជា។ ដូច្នេះ Sailun Cambodia នៅស្វាយរៀងមិនមែនជារោងចក្រចុងក្រោយនោះទេ។

អ្វីដែលគួរឱ្យចាប់អាម្មណ៍មួយទៀតនោះ គឺឯកឧត្តមសាស្រ្តាចារ្យនាយក ប៉ូ គឹមថូ បានឆ្លៀតឱកាសជួបជាមួយបុគ្គលិក១៤នាក់របស់ក្រុមហ៊ុន Sailun Cambodia ដែលជាអតីតនិសិ្សតសាលាតិចណូ។ ថ្នាក់ដឹកនាំពិតជាមានក្តីរំភើបយ៉ាងខ្លាំង ពេលឃើញ ប្អូនៗមិនត្រឹមតែអាចធ្វើការបាននោះទេ តែថែមទាំងទទួលបានការកោតសរសើរពីថ្នាក់ដឹកនាំរោងចក្រ។ គណៈគ្រប់គ្រងក្រុមហ៊ុនបានបញ្ជាក់យ៉ាងច្បាស់ថា ៖ «គឺប្អូនៗទាំងនេះហើយ រួមនឹងធនធានមនុស្សកម្ពុជាដទៃទៀត គឺជាអ្នកគ្រប់គ្រងរោងចក្រនេះ។ ចំណែកអ្នកជំនាញការនិងអ្នកបច្ចេកទេសរបស់ចិន នឹងត្រលប់ទៅប្រទេសវិញ នៅពេលដែលកម្ពុជាអាចគ្រប់គ្រងនិងធ្វើឱ្យដំណើរការរោងចក្រនេះបាន ដោយខ្លួនឯង»។

គណៈប្រតិភូក៏ត្រូវបានអញ្ជើញឱ្យចូលរួមពីធីទទួលទានអាហារជាលក្ខណៈមិត្តភាពទាំងនៅក្នុងរោងចក្រ Sailun Vietnam និង Sailun Cambodia ប្រកបដោយភាពស្និទ្ធស្នាលជាទីបំផុត។

• 

• 

• 

• 

• 

• 

• 

• 

• 

• 

• 

• 

• 

• 

ថ្នាក់ដឹកនាំ និងមន្ត្រីរាជការ និងបុគ្គលិក នៃវិទ្យាស្ថានបច្ចេកវិទ្យាកម្ពុជា សូមអបអរសាទរដោយស្មោះជូនចំពោះនាយករដ្ឋមន្រ្តី ហ៊ុន ម៉ាណែត ក្នុងឱកាសដែលឯកឧត្តមត្រូវបានព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃកម្ពុជា ចេញព្រះរាជក្រឹត្យត្រាស់បង្គាប់ផ្តល់គោរមងារដ៏ឧត្តុង្គឧត្តមខ្ពង់ខ្ពស់បំផុតជា «សម្តេចមហាបវរធិបតី»។

(ITC-Phnom Penh): នាព្រឹកថ្ងៃទី២៥ ខែសីហា ឆ្នាំ២០២៣ តាមតាមស្នើសុំនៃទីភ្នាក់ងារសហប្រតិបត្តិការអន្តរជាតិជប៉ុន (JICA) ក្នុងឱកាសខួបលើកទី ៣០ នៃទំនាក់ទំនងរបស់ខ្លួនជាមួយកម្ពុជានិយាយជារួម និងជាមួយវិទ្យាស្ថានបច្ចេកវិទ្យាកម្ពុជា (សាលាតិចណូ) និយាយដោយឡែក ឯកឧត្តមសាស្រ្តាចារ្យ ប៉ូ គឹមថូ បានផ្តល់កិច្ចសម្ភាសន៍ជាមួយដ៏សំខាន់។

នាឱកាសនោះបន្ទាប់ពីការបរិយាយពីការសិក្សាផ្ទាល់ខ្លួន ឯកឧត្តមសាស្រ្តាចារ្យបានជម្រាបជូនតំណាងJICA ថាសហប្រតិបត្តិការជាមួយប្រទេសជប៉ុនពិតជាមានសារៈសំខាន់ណាស់សម្រាប់សាលាតិចណូ។ ចាប់តាំងពីឆ្នាំ២០០២មកដល់បច្ចុប្បន្ន តាមរយៈទំនាក់ទំនងនេះ ធនធានមនុស្សនៃសាលាតិចណូសរុបជាង៣០០នាក់ ក្រោមគម្រោងអាហារូបករណ៍ AUN/SEED-Net ត្រូវបានបណ្តុះបណ្តាលនៅប្រទេសជប៉ុននិងនៅសាកលវិទ្យាល័យដៃគូមួយចំនួនទៀតរបស់ជប៉ុន។ សាស្រ្តាចារ្យនិងអ្នកស្រាវជា្រវនៃសាលាតិចណូជាង៧០នាក់ គឺជាធនធានមនុស្សដែលបានទទួលអាហារូបករណ៍ (AUN/SEED-Net scholarships) ។ ឯកឧត្តមសាស្រ្តាចារ្យបានមានប្រសាសន៍ថា៖ “ខ្ញុំគឺជានិសិ្សតទី១ដែលបានទទួលអាហារូបករណ៍ AUN/SEED-Net ទៅរៀននៅសាកលវិទ្យាល័យ Chulalongkorn ប្រទេសថៃ កាលពីឆ្នាំ២០០២ និងបានបន្តថ្នាក់បណ្ឌិតនៅឆ្នាំ២០០៦ នៅ Tokyo Institute of Technology ប្រទេសជប៉ុន”។

ប្រទេសជប៉ុនក៏បានផ្តល់អគារមួយខ្នងដែលជាមជ្ឈមណ្ឌលស្រាវជ្រាវ និងនវានុវត្ត របស់សាលាតិចណូបច្ចុប្បន្ន។ លើសពីនេះ តាមរយៈJICA សម្ភារជាច្រើនសម្រាប់ទីពិសោធន៍សំខាន់ៗ បានផ្តល់ឱ្យសាលាតិចណូ និងថែមទាំងបានចូលរួមស្រាវជ្រាវរួមគ្នាក្នុងគម្រោង៖ Satreps។ គម្រោងទី១៖ (២០១៦-២០២១) ផ្តោតលើការអភិរក្សបរិស្ថានបឹងទន្លេសាប និង គម្រោងទី២ (២០២២-២០២៧) ការគ្រប់គ្រងហានិភ័យនៃការបំពុលខ្យល់នៅកម្ពុជា។

គម្រោងមួយទៀតដែលសំខាន់ដែរនោះគឺ គម្រោងពង្រឹងការអប់រំផ្នែកវិស្វកម្ម និងការស្រាវជ្រាវសម្រាប់ការអភិវឌ្ឍឧស្សាហកម្មនៅកម្ពុជា (LBE) បាននឹងកំពុងលើកកម្ពស់ នៅសាលាតិចណូចាប់តាំងពីឆ្នាំ២០១៩។ LBE នេះនឹងពង្រឹងសមត្ថភាពស្រាវជ្រាវនៅកម្រិតសាកលវិទ្យាល័យ ដើម្បីពង្រឹងទំនាក់ទំនងរវាងសាកលវិទ្យាល័យ និងវិស័យឧស្សាហកម្មនៅកម្ពុជា។

ឯកឧត្តមសាស្រ្តាចារ្យបានអរគុណដល់ប្រទេសជប៉ុន និងបានសុំឱ្យបន្តការគាំទ្រ ពិព្រោះគ្រឹះស្ថានមួយនេះពិតជាដើរតួនាទីសំខាន់ក្នុងការអភិវឌ្ឍមូលធនមនុស្សផ្នែកវិស្វកម្មនៅកម្ពុជា។

• 

• 

• 

(ITC-Phonom Penh): នាព្រឹកថ្ងៃទី១៥ ខែសីហា ឆ្នាំ២០២៣ ឯកឧត្តមសាស្រ្តាចារ្យ ប៉ូ គឹមថូ បានទទួលជួបពិភាក្សាការងារជាមួយលោកស្រី Issai TRIA នាយិកានៃIMT Mines Alès នៅប្រទេសបារាំង។

អញ្ជើញចូលរួមពិភាក្សាការងារជាមួយឯកឧត្តមសាស្រ្តាចារ្យនាយករួមមាន៖ លោកបណ្ឌិត យស់ ផានី នាយករងនៃមជ្ឈមណ្ឌលសា្រវជ្រាវនិងនវានុវត្ត លោកបណ្ឌិត ហ៊ិន រ៉ាវេទ នាយករងសាលាក្រោយឧត្តម និងលោកបណ្ឌិត ស្រេង សុខចិន្តា ប្រធានដេប៉ាតឺម៉ង់ ទេពកោសល្យ ទូរគមនាគមន៍ និងបណ្តាញ និងលោក សៀង ផេន ប្រធានការិយាល័យសហប្រតិបត្តការ។

ឯកឧត្តមនាយកបានសង្ខេបពីកម្មវិធីបណ្តុះបណ្តាលនាពេលបច្ចុប្បន្នរបស់សាលាតិចណូនិងកម្មវិធីថ្មីដែលយើងគ្រៀងនឹងបង្កើតដើមី្បឆ្លើយតបនឹងតម្រូវការនាយុគ្គសម័យឌីជីថល ដូចជា៖ AI, Cyber Security ។ល។

នាឱកាសនោះដែរឯកឧត្តមបានអរគុណដល់សាកលវិទ្យាល័យដៃគូមួយនេះ ដែលបញ្ជូនសាស្រ្តាចារ្យ Master Mécatronique និងទទួលយកនិសិ្សតនិងសាស្រា្តចារ្យដើមី្បបន្តការសិក្សានិងទទួលការបណ្តុះបណ្តាលរយៈពេលខ្លី។ ជាក់ស្តែងនាពេលនេះ យើងមាននិសិ្សត៤នាក់កំពុងសិក្សានៅ IMT Mines Alès:

1. M. SAKAL Aylik: Double diplôme en Mécatronique, 2021-2023 (Eiffel)
2. Mlle SOUN Dalin: Double diplôme en IA, 2022-2024 (Eiffel)
3. Mlle CHEK Nita: Echange M2 en IA, 2022-2023 (MIC ERASMUS+)
4. M. CHEA Rothvichea: Double diplôme en Mécatronique, 2022-2024 (MIC ERASMUS+ et HEIP)
   និងក្រោមគម្រោង MIC Erasmus+ កាលពីខែកញ្ញា ឆ្នាំ២០២២ និង ខែមិថុនា ឆ្នាំ២០២៣ យើងបានទទួលសាស្រ្តាចារ្យ៤រូបមកជួយបង្រៀន៖ Ingénierie des systèmes, Intelligence Artificielle និង Mécatronique ។

ដោយសារយើងត្រូវការធនធានមនុស្សនិងការប្រមូលធាតុចូលថ្មីៗបន្ថែមទៀត ដើមី្បបើកដំណើរការជំនាញថ្មីខាងលើ ឯកឧត្តមនាយកបានស្នើដល់លោកស្រីនាយិកាជួយសហការក្នុងរឿងនេះ ដោយជួយទាក់ទងនឹងដៃគូផ្សេងៗទៀតនៅបារាំងដែលគេមានបទពិសោធន៍ច្រើនក្នុងវិស័យនេះ។

លោកស្រី Assia TRIA បានទទួលយកសំណើនេះ និងសន្យាថាខិតខំពង្រឹងកិច្ចហការមានស្រាប់និងបង្កើតកិច្ចកិច្ចសហការថ្មីៗទៀត ក្នុងភាពជាដៃគូរវាងស្ថាប័នទាំងពីរ។

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

•