Author: SIENG Chamroeun

(ITC-Phnom Penh)៖ នារសៀលថ្ងៃអង្គារ ៦រោច ខែពិសាខ ឆ្នាំរោង ឆស័កព.ស.២៥៦៨ ត្រូវនឹងថ្ងៃទី ២៨ ខែឧសភា ឆ្នាំ២០២៤ លោកបណ្ឌិត ងួន កុល្លិកា នាយករងវិទ្យាស្ថានបច្ចេកវិទ្យាកម្ពុជា និងជាតំណាងឯកឧត្តមបណ្ឌិតសាស្រ្តចារ្យ ប៉ូ គឹមថូ នាយកវិទ្យាស្ថានបច្ចេកវិទ្យាកម្ពុជា (សាលាតិចណូ) បានទទួលស្វាគមន៍លោកសាស្រ្តាចារ្យពីររូប មកពីសាកលវិទ្យាល័យ៖ Tongji University នៃប្រទេសចិន។

បើយោងតាមសមភាគី គោលបំណងសំខាន់នៃវត្តមានរបស់ប្រតិភូគឺចង់សហការជាមួយវិទ្យាស្ថានបច្ចេកវិទ្យាកម្ពុជា ក្នុងជំនាញវិស្វកម្មស្ថាបត្យកម្ម។ កិច្ចសហប្រតិបត្តិការចង់ផ្តោតលើវិស័យនេះក្រោមហេតុផលថាប្រទេសកម្ពុជាបច្ចុប្បន្នមានគម្រោងជាច្រើនពាក់ព័ន្ធនឹងនគររូបនីយកម្ម ដែលមានការចូលរួមពីប្រទេសចិន។

ជាការឆ្លើយតបលោកបណ្ឌិតនាយករងបានថ្លែងអំណរគុណចំពោះការសម្លឹងឃើញសាលាតិចណូដើមី្បពិនិត្យមើលឱកាសធ្វើការរួមគ្នា ដូចជាការផ្លាស់ប្តូរនិសិ្សត-សាស្រ្តាចារ្យ និងការធ្វើការស្រាវរួមគ្នា។ លោកនាយករងក៏បានបញ្ជាក់ថាមហាវិទ្យាល័យសំណង់សាលាតិចណូមានដេប៉ាតឺម៉ង់ចំនួន៣គឺ៖ Department of Civil Engineering, Department of Architectural Engineering និង Department of Infrastructure and Transportation។ លោកនាយករងក៏បានជម្រាបជូនភាគីភ្ញៀវពីអ្វីដែលសាលាតិចណូបានកំពុងធ្វើសព្វថ្ងៃផងដែរ ដើមី្បឆ្លើយតបទៅនឹងយុទ្ធសាស្រ្តរបស់ក្រសួងអប់រំ និងគោលនយោបាយរបស់រាជរដ្ឋាភិបាល អាណត្តិទី៧ នៃរដ្ឋសភា។

ជាលទ្ធផល ក្រៅពីការបណ្តុះបណ្តាល ភាគីទាំងពីរនឹងរាយការណ៍ជម្រាបជូនថ្នាក់ដឹកនាំរៀងៗខ្លួនដើមី្បសុំការអនុញ្ញាតធ្វើគម្រោងរួមគ្នាពេលដែលរដ្ឋាភិបាលចិនទម្លាក់គម្រោងមកកម្ពុជាតាមរយៈ Tongji University។

និស្សិតដេប៉ាតឺម៉ង់វិស្វកម្មទូរគមនាគមន៍ និងបណ្តាញ (GTR) នៃវិទ្យាស្ថានបច្ចេកវិទ្យាកម្ពុជាចំនួន ៣ រូប ទទួលបានជ័យលាភីចំណាត់ថ្នាក់លេខ ៣ ផ្នែក Network Track នៅក្នុងការប្រកួតប្រជែងលំដាប់ពិភពលោកនៅក្នុងកម្មវិធី “ប្រកួតប្រជែងពិភពលោកផ្នែកបច្ចេកវិទ្យាគមនាគមន៍ និងព័ត៌មានរបស់ក្រុមហ៊ុន Huawei ឆ្នាំ២០២៣-២០២៤” (Huawei ICT Competition Global Final 2023-2024) ដែលបានប្រព្រឹត្តទៅនៅទីក្រុង Shenzhen ប្រទេសចិន។

វិទ្យាស្ថានសូមចូលរួមអបអរសាទរដល់និស្សិតនារីទាំង ៣រូបដែលទទួលបានជ័យលាភីនេះ គឺ៖

១. កញ្ញា សេង សុមន្ថាវរ័ត្ន

២. កញ្ញា សេង សុមន្ថាវរិន្ទ

៣. កញ្ញា សឿន ឧស្សា

កម្មវិធីសម្ពោធនៃដំណើរការគម្រោង “ការគ្រប់គ្រងអាងស្ទឹងទន្លេចម្រុះ នៃដៃអាងទន្លេមេគង្គ សម្រាប់ការបន្សាំនឹងការប្រែប្រួលអាកាសធាតុនៅកម្ពុជា (Integrated River Basin Management of the Mekong Basin Tributary for Adapation to Climate Change)”

—-

(វបក-ភ្នំពេញ)៖ នាព្រឹកថ្ងៃព្រហស្បតិ៍ ៩កើត ខែពិសាខ ឆ្នាំរោង ឆស័កព.ស.២៥៦៧ ត្រូវនឹងថ្ងៃទី១៦ ខែឧសភា ឆ្នាំ២០២៤ ឯកឧត្តមសាស្រ្តចារ្យបណ្ឌិត ប៉ូ គឹមថូ នាយកវិទ្យាស្ថានបច្ចេកវិទ្យាកម្ពុជា អញ្ជើញជាគណៈអធិបតី ក្នុងកម្មវិធីសម្ពោធនៃដំណើរការគម្រោង “Integrated River Basin Management of the Mekong Basin Tributary for Adapation to Climate Change” ដែលទទួលបានការឧត្ថម្ភថវិកា ក្នុងក្របខណ្ឌមូលនិធិកិច្ចសហប្រតិបត្តិការមេគង្គ-សាធារណរដ្ឋកូរ៉េ (Mekong – Republic of Korea Cooperation Fund: MKCF)។ គម្រោងនេះ នឹងត្រូវដឹកនាំដោយអ្នកស្រាវជ្រាវរបស់វិទ្យាស្ថានបច្ចេកវិទ្យាកម្ពុជា ដែលមានរយៈពេលបីឆ្នាំចាប់ពី ខែមីនា ឆ្នាំ ២០២៤ ដល់ខែកុម្ភៈ ឆ្នាំ ២០២៧។ គម្រោង នឹងចូលរួមចំណែកដោះស្រាយបញ្ហាអាងទន្លេដូចជាគ្រោះទឹកជំនន់ សំណឹកដី និងធនធានទឹកនៅក្នុងតំបន់អាងទន្លេមេគង្គ និងចូលរួមអភិវឌ្ឍសមត្ថភាពនៃការគ្រប់គ្រងអាងទន្លេផងដែរ។

កម្មវិធីនេះ មានការអញ្ជើញចូលរួមពីអ្នកតំណាងពី ក្រសួងការបរទេសនិងសហប្រតិបត្តិការអន្តរជាតិ ក្រសួងធនធានទឹកនិងឧតុនិយម វិទ្យាស្ថានមេគង្គ (Mekong Institute) និងដៃគូភាគីសហប្រតិបត្តិការក្នុងគម្រោង ដូចជា Kyungpook National University, Vietnam Academy of Science and Technology និង National University of Laos។

(វបក-ភ្នំពេញ)៖ នាព្រឹកថ្ងៃទី១៣ ខែឧសភា ឆ្នាំ២០២៤ នៅសាលប្រជុំ២២១-អា លោក សូយ ទី នាយករងវិទ្យាស្ថានបច្ចេកវិទ្យាកម្ពុជា បានស្វាគមន៍ លោក Do Duy Anh និង លោកស្រី Nguyen Ngoc Dung ដើម្បីពិភាក្សាលើកិច្ចសហប្រតិបត្តិការរវាងវិទ្យាស្ថានបច្ចេកវិទ្យាកម្ពុជានិង Centennial College ក្នុងនោះដែរក៏មានការចូលរួមពីប្រធាន អនុប្រធានដេប៉ាតឺម៉ង់មួយចំនួនផងដែរ។

ជាកិច្ចចាប់ផ្តើមលោកនាយករងបានណែនាំនិងធ្វើបទបង្ហាញពីវិទ្យាស្ថានបច្ចេកវិទ្យាកម្ពុជា ហើយបន្ទាប់មកលោកស្រី Nguyen Ngoc Dung ក៏បានធ្វើបទបង្ហាញពី Centennial College។

កម្មវិធីចុងបញ្ចប់គឺ ការពិភាក្សាគ្នាអំពី ឱកាសដែលនឹងអាចធ្វើសហប្រតិបត្តការណ៍ជាមួយគ្នាបានដូចជា ការអាហារូបករណ៍ដើម្បីអោយនិស្សិតកម្ពុជា អាចទៅរៀននៅប្រទេសកាណាដា ក៏ដូចជាការសិក្សាលើកម្មវិធីអនឡាញ ដែលនិស្សិតអាចនឹងទទួលបានសញ្ញាប័ត្របន្ថែមជាដើម។ ក្រោយពីកិច្ចពិភាក្សានេះចប់ ភាគីខាង Centennial College នឹងធ្វើរបាយការណ៍បញ្ជូនទៅទីស្នាក់ការកណ្តាល ហើយនឹងបន្តទំនាក់ទំនងគ្នាជាបន្តទៀត ដើម្បីឈានទៅដល់ការចុះអនុសារណៈយោគយល់គ្នា ដើម្បីជាស្ពានក្នុងការបដិបត្តកម្មវិធីបន្តបន្ទាប់ ដែលបានលើកឡើងក្នុងកិច្ចពិភាក្សាថ្ងៃនេះ។

ក្រោយពីបញ្ចប់កិច្ចពិភាក្សា យើងក៏បាននាំ លោក Do Duy Anh និង លោកស្រី Nguyen Ngoc Dung ដើរទស្សនកិច្ច E-learning Studio មន្ទីរពិសោធន៍ បណ្ណាល័យមុននឹងបញ្ចប់កិច្ចជំនួបនាថ្ងៃនេះ។

(វបក-ភ្នំពេញ)៖ នាព្រឹកថ្ងៃពុធ ១កើត ខែពិសាខ ឆ្នាំរោង ឆស័កព.ស.២៥៦៧ ត្រូវនឹងថ្ងៃទី០៨ ខែឧសភា ឆ្នាំ២០២៤ នៅសាលប្រជុំព្រះខ័ន ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ និងវិទ្យាស្ថានបច្ចេកវិទ្យាកម្ពុជា (សាលាតិចណូ) បានរៀបចំពិធីចុះហត្ថលេខាលើអនុសារណៈនៃការយោគយល់គ្នា ស្តីពីកិច្ចសហប្រតិបត្តិការលើការអភិវឌ្ឍធនធានមនុស្ស

ក្នុងវិស័យទឹកស្អាត។

ពិធីនេះស្ថិតក្រោមអធិបតីភាព ឯកឧត្តមសាស្រ្តាចារ្យបណ្ឌិត ប៉ូ គឹមថូ នាយកវិទ្យាស្ថាន និង ឯកឧត្តម សយ ភីរម្យ រដ្ឋលេខាធិការ និង ឯកឧត្តម តន់ សុខជា អគ្គនាយកនៃអគ្គនាយកដ្ឋានទឹកស្អាតនៃក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ ។

ថ្នាក់ដឹកនាំទាំងពីរស្ថាប័នបានបញ្ជាក់យ៉ាងច្បាស់អំពីភាពចាំបាច់នៃការរៀបចំឱ្យមានទឹកស្អាតសម្រាប់ប្រជាពលរដ្ឋរបស់យើង។ ដូច្នេះយើងនឹងបំពេញឱ្យគ្នាទៅវិញទៅមកដើមី្បរៀបចំធនធានមនុស្សដែលឆ្លើយតបនឹងតម្រូវការមួយនេះ។

(វបក–ភ្នំពេញ)៖ នាព្រឹកថ្ងៃទី៣០ ខែមេសា ឆ្នាំ២០២៤ នៅសាលប្រជុំ១១០-អា វិទ្យាស្ថានបច្ចេកវិទ្យាកម្ពុជា និង ព្រីន ហ័ន យូ រៀលអ៊ីស្ទេត(ខេមបូឌា)គ្រុប ឯ.ក បានរៀបចំពិធីចុះហត្ថលេខាលើអនុសារណៈនៃការយោគយល់គ្នា។

ពិធីនេះស្ថិតក្រោមអធិបតីភាព ឯកឧត្តមសាស្រ្តាចារ្យបណ្ឌិត ប៉ូ គឹមថូ នាយកវិទ្យាស្ថាន និង លោក Chen Yinghui អនុប្រធានក្រុមហ៊ុន។

ជាកិច្ចចាប់ផ្តើមឯកឧត្តមនាយកបានបញ្ជាក់យ៉ាងច្បាស់ភាពជាដៃគូជាមួយក្រុមហ៊ុន ព្រីន ហ័ន យូ គឺពិតជាសំខាន់ ព្រោះថាសាលាតិចណូតែខ្លួនឯងគឺមិនអាចសម្រេចការងារមួយចំនួនបានទេ បើសិនជាមិនមានការចូលរួមពីវិស័យឯកជន។ មានតែរោងចក្រ សហគ្រាស ដែលទទួលនិសិ្សតបញ្ចប់ការសិក្សាទៅធ្វើការនោះទេ ដែលអាចបញ្ជាក់មកសាលាវិញថាតើពួកគាត់នៅមានចំនុចខ្វះខាតអ្វីខ្លះ។

ឯកឧត្តមបានមានប្រសាសន៍ថាបេសកកម្មរបស់សាលាតិចណូគឺបណ្តុះបណ្តាល៖ បរិញ្ញាបត្ររងវិស្វកម្ម វិស្វករ បរិញ្ញាបត្រជាន់ខ្ពស់ បណ្ឌិត និងការស្រាវជ្រាវ។ លើសពីនេះយើងក៏មានតួនាទីចែករំលែកដល់ក្រុមហ៊ុននូវបច្ចេកវិទ្យាថ្មីមួយចំនួនដើមី្បពង្រឹងគុណភាពនិងបង្កើតផលិតភាព។

ជាការឆ្លើយតបលោក Chen Yinghui បានថ្លែងអំណរគុណចំពោះឯកឧត្តមនាយក ដែលអនុញ្ញាតឱ្យក្រុមហ៊ុនបានក្លាយជាដៃគូសហការ ដើមី្បស្រូបយកនិសិ្សតឱ្យធ្វើកម្មសិក្សានិងធ្វើការ។ លោកក៏ចង់ឃើញស្ថាប័នទាំងពីរអាចធ្វើអ្វីលើសពីបានរៀបរាប់ខាងលើ គឺដូចជាការស្រាវជ្រាវរួមគ្នា ការចែករំលែកនូវជំនាញខ្លះពីក្រុមហ៊ុន ដល់សាស្រ្តាចារ្យ ជាដើម។

ជារួមក្រុមហ៊ុន ព្រីន ហ័ន យូ ដែលបានចាប់កំណើតនៅឆ្នាំ២០១៥ ក្នុងប្រទេសកម្ពុជា មានការវិនិយោគលើផ្ទៃជិត៣០០ហត (បុរីភូមិសំរោង) ត្រូវការធនធានមនុស្សលើវិស័យ៖ សំណង់ អគ្គិសនី ប្រព័ន្ធទឹក ដេក័រ លេនស្កែបដែលគ្របដណ្តប់លើ សេវាកម្មគ្រប់គ្រងអចលនទ្រព្យ មជ្ឈមណ្ឌលកម្សាន្ត អចលនទ្រព្យពាណិជ្ជកម្ម និងផ្សារទំនើប ។ល។

ឯកឧត្តមសាស្រ្តាចារ្យនាយកក៏បានអរគុណសាជាថ្មីដល់ក្រុមហ៊ុន និងបានស្នើសុំឱ្យក្រុមហ៊ុនសហការជាមួយដេប៉ាតឺម៉ង់ពាក់ព័ន្ធដើមី្បផ្សព្វផ្សាយព័ត៌មានពីក្រុមហ៊ុនឱ្យបានទូលំទូលាយដល់និសិ្សរបស់យើងជាពិសេសឆ្នាំទី៥ និងឆ្នាំទី២សម្រាប់បរិញ្ញាបត្ររងវិស្វកម្ម។

(ITC-PHNOM PENH): កាលពីរសៀលថ្ងៃទី២៣ ខែមេសា ឆ្នាំ២០២៤ មានការរៀបចំពិធីប្រកាសតែងតាំង និងប្រគល់ភារកិច្ចដល់មន្ត្រីរាជការនៃវិទ្យាស្ថានបច្ចេកវិទ្យាកម្ពុជា (សាលាតិចណូ) ចំនួន ៧រូប ក្រោមអធិបតីភាព ឯកឧត្តមសាស្រ្តាចារ្យបណ្ឌិត ប៉ូ គឹមថូ នាយកវិទ្យាស្ថានបច្ចេកវិទ្យាកម្ពុជា។ ពិធីនេះបានប្រព្រឹត្តទៅនៅសាលប្រជុំ១១០-អា សាលាតិចណូ ដោយមានការអញ្ជើញចូលរួមពីសំណាក់ថ្នាក់ដឹកនាំ លោក លោកស្រី ព្រឺទ្ធបុរស ព្រឹទ្ធបុរសរង និងមន្ត្រីរាជការជាច្រើនរូបទៀត។

យោងតាមអនុក្រឹត្យ វិទ្យាស្ថានបានសម្រេចតែងតាំងមន្ត្រីចំនួន៧រូបរួមមាន៖ នាយករងចំនួន១រូប ព្រឺទ្ធបុរសចំនួន៥រូប ប្រធានមជ្ឈមណ្ឌលស្រាវជ្រាវនិងនវានុវត្តន៍១រូប។

នៅក្នុងឱកាសនោះ ឯកឧត្តមនាយកវិទ្យាស្ថាន បានផ្តល់អនុសាសន៍ ផ្តាំផ្ញើដល់មន្ត្រីរាជការដែលទើបតែងតាំងថ្មីនិងមន្ត្រីរាជការក្រោមឱវាទពាក់ព័ន្ធនឹងកិច្ចការបង្រៀន ស្រាវជ្រាវ មានជាអាទិ៍៖ – ត្រូវខិតខំបំពេញការងារតាមតួនាទីភារកិច្ចរបស់ខ្លួនប្រកបដោយស្មារតីទទួលខុសត្រូវខ្ពស់ ឆ្លើយតបឱ្យបានស័ក្តសមនឹងទំនុកចិត្តរបស់ប្រទេសជាតិនិងប្រជាជនយើង – ត្រូវបង្កើនសាមគ្គីភាពផ្ទៃក្នុងរវាងមន្ត្រីរាជការទាំងអស់ក្នុងការបង្កើននូវប្រសិទ្ធភាពការងារ ដើម្បីរួមចំណែកជម្រុញអនុវត្តប្រកបដោយជោគជ័យនូវកម្មវិធីនយោបាយ និងយុទ្ធសាស្ត្របច្ចកោណរបស់រាជរដ្ឋាភិបាល ក្រោមការដឹកនាំដ៏ឈ្លាសវៃរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។