Category: News

(ភ្នំពេញ)៖ នៅថ្ងៃអង្គារ ទី៣០ ខែសីហា ឆ្នាំ២០២២ វេលាម៉ោង ៣រសៀល លោកស្រី Shomi Kim នាយិការថ្មីនៃវិទ្យាស្ថាន Grobal Green Growth Institute (GGGI) បានចូលជួបសម្តែងការគួរសមជាមួយ ឯកឧត្តមបណ្ឌិត ប៉ូ គឹមថូ ដើម្បីពង្រឹងកិច្ចសហប្រតិបត្តិការទ្វេភាគី GGGI-ITC ។
ឯកឧត្តមបណ្ឌិត បានមានប្រសាសន៍ថា៖ ដោយសារវិទ្យាស្ថានបច្ចេកវិទ្យាកម្ពុជាបច្ចុប្បន្ន (ITC) មានអគារតិចនិងទំហ៊ំតូចបើធៀបនឹងតម្រូវការជាក់ស្តែង ហើយជាពិសេសរដ្ឋាភិបាលស្វែងរកការលើកកម្ពស់STEMនោះ ដូច្នេះហើយបានជាITCមានសាខាចំនួន 3 បន្ថែមទៀត។ គួរយល់ថា ITC បច្ចុប្បន្នមាន ៥មហាវិទ្យាល័យ, មជ្ឈមណ្ឌលស្រាវជ្រាវ និងនវានុវត្តន៍, និងសាលាក្រោយបរិញ្ញាបត្រ។ ឯកឧត្តមបានមានប្រសាសន៍បន្ថែមថា៖ ITC តែម្នាក់ឯងមិនអាចផលិតធនធានមនុស្សបានគ្រប់គ្រាន់សម្រាប់តម្រូវការនៃឧស្សាហកម្មនៅទូទាំងប្រទេសនោះទេ។ ក្នុងន័យនេះ ក្រោមគម្រោង LBE និង HEIP, បាននិងកំពុងអនុញ្ញាតឱ្យសាលាតិចណូអាចជួយសាកលវិទ្យាល័យស្វាយរៀង និងសាកលវិទ្យាល័យជាតិបាត់ដំបង ឲ្យមានបុគ្គលិកបង្រៀនដែលមានសមត្ថភាពក្រប់គ្រាន់ ដើមី្បធានាបាននូវការបណ្តុះបណ្តាលប្រកបដោយគុណភាពនិងចេរភាព សម្រាប់តំបន់សេដ្ឋកិច្ចនៅព្រំដែនវៀតណាម និងថៃ។ លើសពីនេះ សម្រាប់សាលាតិចណូ យើងយល់ឃើញថា University-Industry Linkage ក៏ដើរតួយ៉ាងសំខាន់ក្នុងការបណ្តុះបណ្តាលធនធានមនុស្សដែលក្រុមហ៊ុនត្រូវការ។ មានន័យថាមតិត្រឡប់ពីដៃគូ ដែលជាវិស័យឯកជនរបស់យើង ជាពិសេសពាក់ព័ន្ធនឹងការខ្វះខាតរបស់យើង ពិតជាអាចឱ្យយើងធ្វើបច្ចុប្បន្នភាពកម្មវិធីបណ្តុះបណ្តាលមួយ ដែលឆ្លើយតបពិតប្រាកដទៅនឹងយន្តការថ្មីនៃសករាជបដិវត្តន៍ឧស្សាហកម្ម៤.0។
ចំណែកលោកស្រីនាយិការវិញ លោកស្រីបានអបអរសាទរចំពោះមុខតំណែងថ្មីរបស់ឯកឧត្តមនាយកបណ្ឌិត ប៉ូ គឹមថូ ព្រមទាំងមានការចាប់អារម្មណ៍យ៉ាងខ្លាំងចំពោះការអភិវឌ្ឍន៍ប្រកបដោយនិរន្តរភាពរបស់ ITC ។ លោកស្រីបានបញ្ជាក់៖ យោងតាមខ្លឹមសារនៃ MoU វិស័យដែលគ្របដណ្តប់ដោយកិច្ចសហប្រតិបត្តិការរវាងស្ថាប័នរបស់យើងគឺ៖

• ការគ្រប់គ្រងកាកសំណល់,
• ឧស្សាហកម្មបៃតង,
• ការចល័តប្រកបដោយនិរន្តរភាព,
• សកម្មភាពអគារបៃតងរួមគ្នា,
• លើកកម្ពស់ភាពជាសហគ្រិនប្រកបដោយនិរន្តរភាពសម្រាប់ក្រុមហ៊ុនដែលជំរុញដោយបច្ចេកវិទ្យា,
• ការត្រួតពិនិត្យថាមពល ការត្រួតពិនិត្យថាមពល ការត្រួតពិនិត្យភាពតានតឹងកម្ដៅក្នុងអគារ និងរោងចក្រ,
• ការអភិវឌ្ឍន៍ឧបករណ៍ IT ដែលពាក់ព័ន្ធ,
• កម្មវិធីបណ្តុះបណ្តាល អ្នកបណ្តុះបណ្តាល និងប្រព័ន្ធបញ្ជាក់ជំនាញ,
• រៀបចំសន្និសីទ និងព្រឹត្តិការណ៍នានាទាក់ទងនឹងការអភិវឌ្ឍន៍ប្រកបដោយចីរភាព,
• កម្មសិក្សារបស់និស្សិត ITC នៅ GGGI,
• ការបោះពុម្ពរួមគ្នា,
• ការិយាល័យបៃតង បរិវេណសាលាបៃតង និងព្រឹត្តិការណ៍បៃតង…
  ដើម្បីសម្រេចសកម្មភាពខាងលើ GGGI ពឹងផ្អែកលើអ្នកស្រាវជ្រាវ ITC ដែលចូលរួមយ៉ាងសកម្មចាប់តាំងពីវត្តមានរបស់យើងនៅក្នុងបរិវេណ ITC ។
  ជាការឆ្លើយតប ឯកឧត្តមបណ្ឌិត បានបញ្ជាក់ពីការត្រៀមខ្លួនបន្តចូលរួមរបស់អ្នកស្រាវជ្រាវ ITC លើផ្នែកផ្សេងៗដែលបានលើកឡើង ជាពិសេសការគ្រប់គ្រងសំណល់, ទឹកកខ្វក់, សវនកម្មថាមពល ការត្រួតពិនិត្យថាមពល ការត្រួតពិនិត្យភាពតានតឹងកម្ដៅនៅក្នុងអគារ និងរោងចក្រ, និងឧស្សាហកម្មបៃតង។ល។
  ឯកឧត្តមក៏បានបញ្ជាក់បន្ថែមចុងក្រោយថា៖ បន្ទាប់ពីជំនួបនេះ កិច្ចប្រជុំពិភាក្សាបច្ចេកទេសផ្សេងទៀតនឹងប្រព្រឹត្តទៅដើម្បីពិភាក្សា និងកំណត់លម្អិតអំពីសកម្មភាពដែលត្រូវអនុវត្តដើម្បីផលប្រយោជន៍រួម។

(កំពត)៖ នាព្រឹកថ្ងៃអាទិត្យ ២កើត ខែភទ្របទ ឆ្នាំខាល ចត្វាស័កព.ស.២៥៦៦ ត្រូវនឹងថ្ងៃទី២២ ខែសីហា ឆ្នាំ២០២២ សិក្ខាសាលាស្តីពី “ការអនុវត្តនៃសៀវភៅប្រតិបត្តិប្រព័ន្ធគុណភាពឧត្តមសិក្សា (ផ្ទៃក្នុងនិងផ្ទៃក្រៅ)” ត្រូវបានរៀបចំនៅសណ្ឋាគារ ឌីយ៉ាម៉ង់កំពត ខេត្តកំពត។
កម្មវិធីនេះដំណើរការទៅបានដោយមានការគំាទ្រថវិការបស់គម្រោងកែលម្អការអប់រំឧត្តមសិក្សានៃវិទ្យាស្ថានបច្ចេកវិទ្យាកម្ពុជា នឹងប្រព្រឹត្តទៅចំនួនពីរថ្ងៃគឺ៖ ថ្ងៃទី២៨ និង ២៩ ខែសីហា ឆ្នាំ២០២២។
ឯកឧត្តមបណ្ឌិត អ៊ុម រម្យណី រដ្ឋលេខាធិការក្រសួងអប់រំ យុវជន និងកីឡា និងឯកឧត្តមបណ្ឌិត ប៉ូ គឹមថូ នាយកវិទ្យាស្ថានបច្ចេកវិទ្យាកម្ពុជា បានអញ្ជើញជាគណៈអធិបតី។
ក៏មានការចូលរួមផងដែរពីលោកនាយករង លោកទីប្រឹក្សា លោក-លោកស្រីសាស្រ្តាចារ្យ ព្រមទាំងបុគ្គលិក សរុបទាំងអស់៥៥នាក់។
ជាកិច្ចចាប់ផ្តើម ឯកឧត្តមនាយក បានមានមតិស្វាគមន៍ដោយបានសង្កត់ធ្ងន់ថាថ្មីៗនេះប្រមុខរាជរដ្ឋាភិបាលបានក្រើនរំលឹកពីការពង្រឹងគុណភាពអប់រំ ដើមី្បសម្រេចឱ្យបានចំណូលមធ្យមកំរិតខ្ពស់ និងចំណូលកម្រិតខ្ពស់ ដែលជាគោលនយោបាយជាតិ។ អ្វីដែលយើងបាននិងកំពុងធ្វើនេះគឺពិតជាឆ្លើយតបទៅនឹងសូចនាកររបស់គណៈកម្មាធិការទទួលស្គាល់គុណភាពអប់រំនៃកម្ពុជា (ACC) និងធនាគារពិភពលោក។
ឯកឧត្តមបានវាយតម្លៃខ្ពស់ចំពោះលោកនាយករងនិងក្រុមការងារ ដែលបានរៀបចំសិក្ខាសាលានេះឡើង និងសង្ឃឹមថាលទ្ធផលរំពឹងទុកពីកិច្ចប្រជុំនេះពិតជាធាតុចូលយ៉ាងសំខាន់សម្រាប់ជួយញាំងឱ្យការបណ្តុះបណ្តាលនិងស្រាវជ្រាវនៅសាលាតិចណូមានលក្ខណៈកាន់តែប្រសើរនិងពេញលេញ ដើមី្បត្រៀមខ្លួនទទួលបានជាផ្លូវការនូវ ISO កំរិតតំបន់និងអន្តរជាតិ នាពេលអនាគត។
ឯកឧត្តមបណ្ឌិត អ៊ុម រម្យណី រដ្ឋលេខាធិការក្រសួងអប់រំ យុវជន និងកីឡា ក៏បានមានប្រសាសន៍ផងដែរថាសិក្ខាសាលានេះពិតជាមានសារសំខាន់ ព្រោះថាគោលនយោបាយចតុកោណដំណាក់កាលទី៤ របស់រាជរដ្ឋាភិបាលដែលបានកំណត់ទស្សនវិស័យជាតិដែលកំណត់យកឆ្នាំ ២០៣០ ដើម្បីប្រែកម្ពុជាពីប្រទេសដែលមានចំណូលមធ្យមកម្រិតទាប ឲ្យក្លាយទៅជាប្រទេសដែលមានប្រាក់ចំណូលធម្យមកម្រិតខ្ពស់ (ចន្លោះពី ៣.៩៩៦ ដុល្លា – ១២.៣៧៥ដុល្លា) ពោលគឺ១០ឆ្នាំទៅមុខទៀត កម្ពុជានឹងដូចប្រទេសថៃ ឬ ម៉ាឡេស៊ីបច្ចុប្បន្ននេះ និងមានប្រាក់ចំណូលកម្រិតខ្ពស់ ២០៥០។
ឯកឧត្តមបានបញ្ជាក់បន្ថែមយ៉ាងច្បាស់ថា ដើមី្បសម្រេចបានគោលដៅនេះ ការបណ្តុះបណ្តាលធនធានមនុស្ស ក្របដោយគុណភាព និងចេរភាព ពិតជាមិនអាចមើលរំលងបានទេ។ រោងចក្រ និងសហគ្រាសនៅកម្ពុជាត្រូវការបុគ្គលិក ដែលមានសមត្ថភាពឆ្លើយតបពិតប្រាកដទៅនឹងបដិវត្តន៍ឧស្សាកម្ម៤.០។
ឯកឧត្តមរដ្ឋលេខាធិការ បានរំលេចតួនាទីដ៏សំខាន់របស់វិទ្យាសាស្រ្ត៖ ក្នុងសករាជឌីជីថល STEM គឺជាសសរស្តមមួយ ដែលយើងត្រូវយកចិត្តទុកដាក់និងពង្រឹង ចាប់ពីកំរិតវិទ្យាល័យមក។ យើងត្រូវលើកទឹកចិត្តអោយសិស្សនៅវិទ្យាល័យត្រលប់មកជ្រើសរើសយកវិទ្យាសាស្រ្តពិតវិញ (sciences exactes) ពិព្រោះនាពេលបច្ចុប្បន្នភាគរយនៃសិ្សវិទ្យាសាស្រ្តពិតតូចជាងភាគរយនៃសិស្សវិទ្យាសាស្រ្តសង្គម (sciences sociales)។
យោងប្រសាសន៍ឯកឧត្តម ជាមួយនឹងហិរញ្ញប្បទាននៃធនាគារពិភពលោក តាមរយៈក្រសួងសេដ្ឋកិច្ចនិងហិរញ្ញវត្ថុ ក្រសួងអប់រំ យុវជន និងកីឡានឹងពង្រឹងវិស័យ STEM ឱ្យដល់កម្រិតមួយដែលយើងត្រូវការ ដោយចាប់ពីកំរិតវិទ្យាល័យដល់សាកលវិទ្យាល័យ។
បន្ទាប់ពីការប្រកាសបើកជាផ្លូវការដោយឯកឧត្តមរដ្ឋលេខាធិការ លោកនាយករង សូយ ទី បានបន្តដឹកនាំការពិភាក្សា។

(ភ្នំពេញ)៖ នារសៀលថ្ងៃទី៩ ខែសីហា ឆ្នាំ២០២២ នៅសាលប្រជុំក្រុមប្រឹក្សាភិបាល២២១អា នៃវិទ្យស្ថានបច្ចេកវិទ្យាកម្ពុជា (សាលាតិចណូ) បានប្រារព្ធពិធីចុះហត្ថលេខាលើអនុស្សរណៈនៃការយោគយល់ (MoU) រវាង វិទ្យស្ថានបច្ចេកវិទ្យាកម្ពុជា ជាមួយនឹង TRA VINH University (TVU) មកពីប្រទេសវៀតណាម ក្រោមអធិបតីភាពឯកឧត្តមបណ្ឌិត អ៊ុម រម្យណី រដ្ឋលេខាធិការក្រសួងអប់រំយុវជន និងកីឡា និងជានាយកកិត្តិយសនៃវិទ្យាស្ថានបច្ចេកវិទ្យាកម្ពុជា ព្រមទាំងឯកឧត្តមបណ្ឌិត ប៉ូ គឹមថូ អគ្គនាយក វិទ្យាស្ថានបច្ចេកវិទ្យាកម្ពុជា និងលោកស្រី TRACH Thi Man នាយិការរង TVU។

គួររំលឹកថា TRA VINH UNIVERSITY ស្ថិតនៅទីក្រុង ត្រាវីង និងខេត្ត ត្រាវីង នៃប្រទេសវៀតណាម ត្រូវបានបង្កើតឡើងនៅឆ្នាំ២០០៦។ បច្ចុប្បន្នសាកលវិទ្យាល័យនេះមាន៖
១- សាខាចំនួន៤
២- និសិ្សតចំនួនជាង២០០.០០០នាក់
៣- មានបុគ្គលិកនិងសាស្រ្តាចារ្យជាង១.០០០នាក់
៤- អន្តេវាសិកដ្ឋាន១ មាននិសិ្សតកំពុងស្នាក់នៅជាង៤.០០០នាក់
៥- ជំនាញខុសៗគ្នា៖
• Health Science,
• Agriculture – Aquaculture,
• Engineering – Technology,
• Foreign Languages,
• Economics and Laws,
• Southern Khmer Language,
• Culture and Arts,
• Applied Chemistry,
• Pedagogy,
• Public Management – Office Administration and Tourism,
• Political Theory និង
• Foundation Science។

ឯកឧត្តមរដ្ឋលេខាធិការ បានស្វាគមន៍យ៉ាងកក់ក្តៅគណប្រតិភូនិងបានរំលឹកពីអនុស្សារីយ៍របស់ថ្នាក់ដឹកនាំនៃស្ថាប័នទាំងពីរ ដែលបានបង្កើតកិច្ចសហប្រតិបត្តិការទ្វេរភាគីនេះឡើង ដើមី្បរួមគ្នាអភិវឌ្ឍន៍និងចែករំលែកគ្នាទៅវិញទៅមកនូវអ្វីដែលយើងអាចធ្វើបាន។ ឯកឧត្តមក៏ចង់ឃើញមិត្តភាពនិងការរួមគ្នាធ្វើនេះ ត្រូវបានពង្រឹងនិងពង្រីកបន្ថែមទៀត នាពេលនេះក៏ដូចជាអនាគត ជាពិសេសលើវិស័យស្រាវជា្រវ។

ចំណែកឯកឧត្តមបណ្ឌិត ប៉ូ គឹមថូ ក៏បានកោតសរសើរចំពោះសមិទ្ធិផលដែលគ្រឹះស្ថានទាំងពីរសម្រេចបាន និយាយជារួម។ ដោយឡែកសាលាតិចណូបានផ្តល់អាហារូបករណ៍ដល់និសិ្សតមកពីTVUចំនួន១១នាក់បើគិតចាប់តាំងពីឆ្នាំសិក្សា២០១១-២០១២។ បើយើងនិយាយពីកិច្ចសហការជាមួយប្រទេសវៀតណាមទាំងមូល យើងបាននិងកំពុង ធ្វើការជាមួយសាកលវិទ្យាល័យមួយចំនួនរួមមាន៖ 1. TRA VINH University, 2. CAN THO University, 3. University of Science and Technology of Hanoi (USTH), 4. Ho Chi Minh University of Technology (HCMUT), 5. Vietnam Maritime University (VMU), 6. The Graduate Academy of Social Sciences (GASS)។ ជាមួយដៃគូទាំងនេះសកម្មភាពស្រាវជ្រាវរួមគ្នា កំពុងដំណើរការយ៉ាងល្អ។

ក្នុងឱកាសនោះដែរ លោកស្រីនាយិការរងTVU ក៏ដូចជាលោកនាយករង Diep Thanh Tung បានថ្លែងអំណរគុណចំពោះការរក្សាជំហរមិត្តភាពយូរអង្វែងរវាងសាលាតិចណូនិងTVU ថែមទាំងបានសន្យាថានឹងខិតខំពង្រីកកិច្ចសហប្រតិបត្តិការនេះ ឱ្យលើសពីអ្វីដែលយើងកំពុងធ្វើនាពេលបច្ចុប្បន្ន។

ជាទីបញ្ចប់ លោកនាយករង សូយ ទី និងលោកស្រី TRACH Thi Man បានចុះហត្ថលេខាលើអនុស្សរណៈនៃការយោគយល់ និងបានប្រគល់វត្ថុអនុស្សាវរីយ៍ ជូនគ្នាទៅវិញទៅមក ក្នុងបរិយាកាសស្និតស្នាលនិងយោគយល់គ្នាខ្ពស់។