Author: SIENG Chamroeun

(កំពត)៖ នាព្រឹកថ្ងៃអាទិត្យ ២កើត ខែភទ្របទ ឆ្នាំខាល ចត្វាស័កព.ស.២៥៦៦ ត្រូវនឹងថ្ងៃទី២២ ខែសីហា ឆ្នាំ២០២២ សិក្ខាសាលាស្តីពី “ការអនុវត្តនៃសៀវភៅប្រតិបត្តិប្រព័ន្ធគុណភាពឧត្តមសិក្សា (ផ្ទៃក្នុងនិងផ្ទៃក្រៅ)” ត្រូវបានរៀបចំនៅសណ្ឋាគារ ឌីយ៉ាម៉ង់កំពត ខេត្តកំពត។
កម្មវិធីនេះដំណើរការទៅបានដោយមានការគំាទ្រថវិការបស់គម្រោងកែលម្អការអប់រំឧត្តមសិក្សានៃវិទ្យាស្ថានបច្ចេកវិទ្យាកម្ពុជា នឹងប្រព្រឹត្តទៅចំនួនពីរថ្ងៃគឺ៖ ថ្ងៃទី២៨ និង ២៩ ខែសីហា ឆ្នាំ២០២២។
ឯកឧត្តមបណ្ឌិត អ៊ុម រម្យណី រដ្ឋលេខាធិការក្រសួងអប់រំ យុវជន និងកីឡា និងឯកឧត្តមបណ្ឌិត ប៉ូ គឹមថូ នាយកវិទ្យាស្ថានបច្ចេកវិទ្យាកម្ពុជា បានអញ្ជើញជាគណៈអធិបតី។
ក៏មានការចូលរួមផងដែរពីលោកនាយករង លោកទីប្រឹក្សា លោក-លោកស្រីសាស្រ្តាចារ្យ ព្រមទាំងបុគ្គលិក សរុបទាំងអស់៥៥នាក់។
ជាកិច្ចចាប់ផ្តើម ឯកឧត្តមនាយក បានមានមតិស្វាគមន៍ដោយបានសង្កត់ធ្ងន់ថាថ្មីៗនេះប្រមុខរាជរដ្ឋាភិបាលបានក្រើនរំលឹកពីការពង្រឹងគុណភាពអប់រំ ដើមី្បសម្រេចឱ្យបានចំណូលមធ្យមកំរិតខ្ពស់ និងចំណូលកម្រិតខ្ពស់ ដែលជាគោលនយោបាយជាតិ។ អ្វីដែលយើងបាននិងកំពុងធ្វើនេះគឺពិតជាឆ្លើយតបទៅនឹងសូចនាកររបស់គណៈកម្មាធិការទទួលស្គាល់គុណភាពអប់រំនៃកម្ពុជា (ACC) និងធនាគារពិភពលោក។
ឯកឧត្តមបានវាយតម្លៃខ្ពស់ចំពោះលោកនាយករងនិងក្រុមការងារ ដែលបានរៀបចំសិក្ខាសាលានេះឡើង និងសង្ឃឹមថាលទ្ធផលរំពឹងទុកពីកិច្ចប្រជុំនេះពិតជាធាតុចូលយ៉ាងសំខាន់សម្រាប់ជួយញាំងឱ្យការបណ្តុះបណ្តាលនិងស្រាវជ្រាវនៅសាលាតិចណូមានលក្ខណៈកាន់តែប្រសើរនិងពេញលេញ ដើមី្បត្រៀមខ្លួនទទួលបានជាផ្លូវការនូវ ISO កំរិតតំបន់និងអន្តរជាតិ នាពេលអនាគត។
ឯកឧត្តមបណ្ឌិត អ៊ុម រម្យណី រដ្ឋលេខាធិការក្រសួងអប់រំ យុវជន និងកីឡា ក៏បានមានប្រសាសន៍ផងដែរថាសិក្ខាសាលានេះពិតជាមានសារសំខាន់ ព្រោះថាគោលនយោបាយចតុកោណដំណាក់កាលទី៤ របស់រាជរដ្ឋាភិបាលដែលបានកំណត់ទស្សនវិស័យជាតិដែលកំណត់យកឆ្នាំ ២០៣០ ដើម្បីប្រែកម្ពុជាពីប្រទេសដែលមានចំណូលមធ្យមកម្រិតទាប ឲ្យក្លាយទៅជាប្រទេសដែលមានប្រាក់ចំណូលធម្យមកម្រិតខ្ពស់ (ចន្លោះពី ៣.៩៩៦ ដុល្លា – ១២.៣៧៥ដុល្លា) ពោលគឺ១០ឆ្នាំទៅមុខទៀត កម្ពុជានឹងដូចប្រទេសថៃ ឬ ម៉ាឡេស៊ីបច្ចុប្បន្ននេះ និងមានប្រាក់ចំណូលកម្រិតខ្ពស់ ២០៥០។
ឯកឧត្តមបានបញ្ជាក់បន្ថែមយ៉ាងច្បាស់ថា ដើមី្បសម្រេចបានគោលដៅនេះ ការបណ្តុះបណ្តាលធនធានមនុស្ស ក្របដោយគុណភាព និងចេរភាព ពិតជាមិនអាចមើលរំលងបានទេ។ រោងចក្រ និងសហគ្រាសនៅកម្ពុជាត្រូវការបុគ្គលិក ដែលមានសមត្ថភាពឆ្លើយតបពិតប្រាកដទៅនឹងបដិវត្តន៍ឧស្សាកម្ម៤.០។
ឯកឧត្តមរដ្ឋលេខាធិការ បានរំលេចតួនាទីដ៏សំខាន់របស់វិទ្យាសាស្រ្ត៖ ក្នុងសករាជឌីជីថល STEM គឺជាសសរស្តមមួយ ដែលយើងត្រូវយកចិត្តទុកដាក់និងពង្រឹង ចាប់ពីកំរិតវិទ្យាល័យមក។ យើងត្រូវលើកទឹកចិត្តអោយសិស្សនៅវិទ្យាល័យត្រលប់មកជ្រើសរើសយកវិទ្យាសាស្រ្តពិតវិញ (sciences exactes) ពិព្រោះនាពេលបច្ចុប្បន្នភាគរយនៃសិ្សវិទ្យាសាស្រ្តពិតតូចជាងភាគរយនៃសិស្សវិទ្យាសាស្រ្តសង្គម (sciences sociales)។
យោងប្រសាសន៍ឯកឧត្តម ជាមួយនឹងហិរញ្ញប្បទាននៃធនាគារពិភពលោក តាមរយៈក្រសួងសេដ្ឋកិច្ចនិងហិរញ្ញវត្ថុ ក្រសួងអប់រំ យុវជន និងកីឡានឹងពង្រឹងវិស័យ STEM ឱ្យដល់កម្រិតមួយដែលយើងត្រូវការ ដោយចាប់ពីកំរិតវិទ្យាល័យដល់សាកលវិទ្យាល័យ។
បន្ទាប់ពីការប្រកាសបើកជាផ្លូវការដោយឯកឧត្តមរដ្ឋលេខាធិការ លោកនាយករង សូយ ទី បានបន្តដឹកនាំការពិភាក្សា។

• 

• 

• 

• 

• 

• 

• 

• 

• 

(ភ្នំពេញ)៖ នារសៀលថ្ងៃទី៩ ខែសីហា ឆ្នាំ២០២២ នៅសាលប្រជុំក្រុមប្រឹក្សាភិបាល២២១អា នៃវិទ្យស្ថានបច្ចេកវិទ្យាកម្ពុជា (សាលាតិចណូ) បានប្រារព្ធពិធីចុះហត្ថលេខាលើអនុស្សរណៈនៃការយោគយល់ (MoU) រវាង វិទ្យស្ថានបច្ចេកវិទ្យាកម្ពុជា ជាមួយនឹង TRA VINH University (TVU) មកពីប្រទេសវៀតណាម ក្រោមអធិបតីភាពឯកឧត្តមបណ្ឌិត អ៊ុម រម្យណី រដ្ឋលេខាធិការក្រសួងអប់រំយុវជន និងកីឡា និងជានាយកកិត្តិយសនៃវិទ្យាស្ថានបច្ចេកវិទ្យាកម្ពុជា ព្រមទាំងឯកឧត្តមបណ្ឌិត ប៉ូ គឹមថូ អគ្គនាយក វិទ្យាស្ថានបច្ចេកវិទ្យាកម្ពុជា និងលោកស្រី TRACH Thi Man នាយិការរង TVU។

គួររំលឹកថា TRA VINH UNIVERSITY ស្ថិតនៅទីក្រុង ត្រាវីង និងខេត្ត ត្រាវីង នៃប្រទេសវៀតណាម ត្រូវបានបង្កើតឡើងនៅឆ្នាំ២០០៦។ បច្ចុប្បន្នសាកលវិទ្យាល័យនេះមាន៖
១- សាខាចំនួន៤
២- និសិ្សតចំនួនជាង២០០.០០០នាក់
៣- មានបុគ្គលិកនិងសាស្រ្តាចារ្យជាង១.០០០នាក់
៤- អន្តេវាសិកដ្ឋាន១ មាននិសិ្សតកំពុងស្នាក់នៅជាង៤.០០០នាក់
៥- ជំនាញខុសៗគ្នា៖
• Health Science,
• Agriculture – Aquaculture,
• Engineering – Technology,
• Foreign Languages,
• Economics and Laws,
• Southern Khmer Language,
• Culture and Arts,
• Applied Chemistry,
• Pedagogy,
• Public Management – Office Administration and Tourism,
• Political Theory និង
• Foundation Science។

ឯកឧត្តមរដ្ឋលេខាធិការ បានស្វាគមន៍យ៉ាងកក់ក្តៅគណប្រតិភូនិងបានរំលឹកពីអនុស្សារីយ៍របស់ថ្នាក់ដឹកនាំនៃស្ថាប័នទាំងពីរ ដែលបានបង្កើតកិច្ចសហប្រតិបត្តិការទ្វេរភាគីនេះឡើង ដើមី្បរួមគ្នាអភិវឌ្ឍន៍និងចែករំលែកគ្នាទៅវិញទៅមកនូវអ្វីដែលយើងអាចធ្វើបាន។ ឯកឧត្តមក៏ចង់ឃើញមិត្តភាពនិងការរួមគ្នាធ្វើនេះ ត្រូវបានពង្រឹងនិងពង្រីកបន្ថែមទៀត នាពេលនេះក៏ដូចជាអនាគត ជាពិសេសលើវិស័យស្រាវជា្រវ។

ចំណែកឯកឧត្តមបណ្ឌិត ប៉ូ គឹមថូ ក៏បានកោតសរសើរចំពោះសមិទ្ធិផលដែលគ្រឹះស្ថានទាំងពីរសម្រេចបាន និយាយជារួម។ ដោយឡែកសាលាតិចណូបានផ្តល់អាហារូបករណ៍ដល់និសិ្សតមកពីTVUចំនួន១១នាក់បើគិតចាប់តាំងពីឆ្នាំសិក្សា២០១១-២០១២។ បើយើងនិយាយពីកិច្ចសហការជាមួយប្រទេសវៀតណាមទាំងមូល យើងបាននិងកំពុង ធ្វើការជាមួយសាកលវិទ្យាល័យមួយចំនួនរួមមាន៖ 1. TRA VINH University, 2. CAN THO University, 3. University of Science and Technology of Hanoi (USTH), 4. Ho Chi Minh University of Technology (HCMUT), 5. Vietnam Maritime University (VMU), 6. The Graduate Academy of Social Sciences (GASS)។ ជាមួយដៃគូទាំងនេះសកម្មភាពស្រាវជ្រាវរួមគ្នា កំពុងដំណើរការយ៉ាងល្អ។

ក្នុងឱកាសនោះដែរ លោកស្រីនាយិការរងTVU ក៏ដូចជាលោកនាយករង Diep Thanh Tung បានថ្លែងអំណរគុណចំពោះការរក្សាជំហរមិត្តភាពយូរអង្វែងរវាងសាលាតិចណូនិងTVU ថែមទាំងបានសន្យាថានឹងខិតខំពង្រីកកិច្ចសហប្រតិបត្តិការនេះ ឱ្យលើសពីអ្វីដែលយើងកំពុងធ្វើនាពេលបច្ចុប្បន្ន។

ជាទីបញ្ចប់ លោកនាយករង សូយ ទី និងលោកស្រី TRACH Thi Man បានចុះហត្ថលេខាលើអនុស្សរណៈនៃការយោគយល់ និងបានប្រគល់វត្ថុអនុស្សាវរីយ៍ ជូនគ្នាទៅវិញទៅមក ក្នុងបរិយាកាសស្និតស្នាលនិងយោគយល់គ្នាខ្ពស់។

• 

• 

• 

• 

• 

• 

• 

• 

• 

• 

• 

• 

• 

• 

(ភ្នំពេញ)៖ នាព្រឹកថ្ងៃទី២៨ ខែកក្កដា ឆ្នាំ២០២២ នៅសាលប្រជុំក្រុមប្រឹក្សាភិបាល២២១អា នៃវិទ្យស្ថានបច្ចេកវិទ្យាកម្ពុជា បានប្រារព្ធពិធីចុះហត្ថលេខាលើអនុស្សរណៈនៃការយោគយល់ (MoU) រវាង វិទ្យស្ថានបច្ចេកវិទ្យាកម្ពុជា ជាមួយនឹងក្រុមហ៊ុន WOWNOW ក្រោមអធិបតីភាពរបស់ឯកឧត្តមបណ្ឌិត ប៉ូ គឹមថូ អគ្គនាយក វិទ្យាស្ថានបច្ចេកវិទ្យាកម្ពុជា និងលោកស្រី Jasper LIU ប្រធានសាខា WOWNOW ។

បើយោងតាមការអះអាងរបស់លោក Shamyrat BAYRAMOV ប្រធានទីផ្សារ, ក្រុមហ៊ុន WOWNOW Super App បានចាប់កំណើតនៅក្នុងប្រទេសកម្ពុជាកាលពីឆ្នំា២០២០។ គោលបំណងរបស់យើងគឺដើម្បីធ្វើឱ្យជីវិតមានភាពងាយស្រួលសម្រាប់អ្នករស់នៅក្នុងប្រទេសកម្ពុជា តាមរយៈការផ្តល់សេវាកម្មរបៀបរស់នៅ។

ចំណែកឯលោកស្រីប្រធានសាខាបានបញ្ជាក់បន្ថែមថាអ្វីដែលក្រុមហ៊ុនការចង់ធ្វើនិងចង់ឃើញ គឺសកម្មភាពលើសពីការធ្វើជំនួញ (ការរកស៊ី) គឺការចូលរួមជួយសង្គម៖ តាមរយៈការផ្តល់អាហារូបករណ៍ ការផ្តល់ការងារ ការចូលរួមសកម្មភាពផ្សេងៗដែលមានប្រយោជន៍ដល់សង្គម។ល។ លោកស្រីបានបន្ថែមថា ក្រុមហ៊ុននឹងស្វាគមន៍ប្អូនៗនិសិ្សត ឆ្នាំទី៣ ទី៤ ឬទី៥ ដែលចង់ចុះធ្វើកម្មសិក្សា ជាពិសេសប្អូនៗខាងអាយធី IT។

ដូច្នេះហើយបានជាថ្ងៃនេះ WOWNOW រៀបចំចុះហត្ថលេខាជាមួយវិទ្យស្ថានបច្ចេកវិទ្យាកម្ពុជា ដើមី្បរួមគ្នាសម្រេចគោលដៅខាងលើ។

កញ្ញាបណ្ឌិត អ៊ិន សុខនាង ក៏បានជម្រាបជូនក្រុមហ៊ុនផងដែរ ពីឱកាសដែល WOWNOW អាចចូលរួមបានជាមួយសាលាតិចណូគឺព្រឹត្តិការណ៍ធំៗពីរ៖វេទិការការងារ (Career Forum)និង សន្និសីទវិទ្យាសាស្រ្ត ដែលមានលក្ខណៈអន្តរជាតិ (Scientific Day) ដែលយើងប្រារព្ធធ្វើមួយឆ្នាំម្តង។

ក្នុងឱកាសនោះដែរ ឯកឧត្តម ប៉ូ គឹមថូ បានមានប្រសាសន៍ថា ថ្ងៃនេះវិទ្យាស្ថានបច្ចេកវិទ្យាកម្ពុជាមានដៃគូថ្មីមួយទៀតគឺក្រុមហ៊ុន WOWNOW។ ខ្ញុំសង្ឃឹមថា៖ “តាមរយៈអនុស្សរណៈនៃការយោគយល់នេះ ស្ថាប័នយើងទាំងពីរនឹងអាចបំពេញតម្រូវការឱ្យគ្នាទៅវិញទៅមក តាមយៈសកម្មភាពផ្សេងៗ ដែលបានជម្រាបជូនខាងលើ”។

ជាទីបញ្ចប់ ឯកឧត្តម ប៉ូ គឹមថូ និងលោកស្រី Jasper LIU បានចុះហត្ថលេខាលើអនុស្សរណៈនៃការយោគយល់ និងបានប្រគល់វត្ថុអនុស្សាវរីយ៍ ជូនគ្នាទៅវិញទៅមកនាពេលនោះផងដែរ។

(ភ្នំពេញ)៖ នាព្រឹកថ្ងៃពុធ ១៤រោច ខែអាសាឍ ឆ្នាំខាល ចត្វាស័កព.ស.២៥៦៦ ត្រូវនឹងថ្ងៃទី២៧ ខែកក្កដា ឆ្នាំ២០២២ សាលាក្រោយបរិញ្ញាបត្រ (Programme du 3ème cycle – Graduate School (GS)) បានរៀបចំកិច្ចប្រជុំមួយដើមី្បប្រមូលធាតុចូល ក្នុងការរៀបចំសៀវភៅណែនាំសម្រាប់និសិ្សតបរិញ្ញាបត្រជាន់ខ្ពស់ “Graduate Student Manual”។ ការរៀបចំនេះស្ថិតក្រោមគម្រោង HEIP C1.2 ទាក់ទងនឹងការកែលម្អការគ្រប់គ្រងសាលាក្រោយបរិញ្ញាបត្រជាន់ខ្ពស់នៃវិទ្យាស្ថានបច្ចេកវិទ្យាកម្ពុជា។

យោងតាមលោក ស៊ឹម ទេពមុនី នាយកសាលាក្រោយបញ្ញាបត្រ GSត្រូវបានបង្កើតឡើងដោយអនុក្រឹត្យ កាលពីថ្ងៃទី១៧ ខែមិនា ឆ្នាំ២០១៥។ មកទល់នឹងបច្ចុប្បន្ន ៖
១) និសិ្សតបរិញ្ញាបត្រជាន់ខ្ពស់ចំនួន២២៧ និងបណ្ឌិត៤នាក់ បានបញ្ចប់ការសិក្សាដោយជោគជ័យ
២) និងនិសិ្សតបរិញ្ញាបត្រជាន់ខ្ពស់១២២នាក់ និងបណ្ឌិត៥៤នាក់ កំពុងសិក្សា។

សូមថ្លែងអំណរគុណដល់ លោកបណ្ឌិត ប៊ុន គឹមងន់ និងលោក នុត សុថន ដែលបានអញ្ជើញចូលរួមជាគណអធិបតីសម្រាប់កិច្ចប្រជុំនេះ និងបានផ្តល់អនុសាសន៍ល្អ ព្រមទាំងបានរំលេចនូវភាពចាំបាច់នៃមគ្គុទេសនាំផ្លូវនេះ សម្រាប់និសិ្សតដែលសិក្សានៅកម្មវិធីកម្រិតក្រោយបរិញ្ញាបត្រ។ នេះគឺជាតម្រូវការបទដ្ឋានមួយ ដើមី្បGSមានលក្ខណៈពេញលេញ និងមានភាពស្មើមុខស្មើមាត់ជាមួយសាលាក្រោយបរិញ្ញាបត្រផ្សេងៗទៀត នៅក្នុងតំបន់និងអន្តរជាតិ។

• 

• 

• 

• 

• 

• 

• 

•